Madriddə futbol şousu: “Real” möhtəşəm geridönüşlə finalda “Liverpul”a rəqib oldu - VİDEO
Çempionlar Liqasında yarımfinal mərhələsinin ikinci cavab görüşü keçirilib.
1news.az xəbər verir ki, "Real" ilk oyunda 3:4 hesabı ilə uduzduğu "Mançester Siti"ni qəbul edib.
Görüş dramatik məcrada keçib. Oyunda hesabı qonaqlar açıb və matçın son dəqiqələrinə qədər üstünlüyünü qoruyub. Ancaq Madrid klubunun hücumçusu Rodriqo 90 və 90+1-ci dəqiqələrdə dubl edərək komandasını məğlubiyyətdən xilas edib, görüş əlavə vaxta gedib. Əlavə vaxtda isə Kərim Benzema penaltidən fərqlənib və "Real" möhtəşəm geridönüşlə finala yüksəlib.
Karlo Ançelottinin komandası finalda iki oyunun nəticəsinə görə "Vilyarreal"ı mübarizədən kənarlaşdıran (2:0 və 3:2) "Liverpul"la üz-üzə gələcək.
Qeyd edək ki, həlledici oyun mayın 28-də Fransanın paytaxtı Parisdəki "Stad de Frans"da keçiriləcək. Görüş Bakı vaxtı ilə saat 23:00-da başlayacaq.
UEFA Çempionlar Liqası, yarımfinal
Cavab oyunu
4 may
23:00. "Real" (İspaniya) - "Mançester Siti" (İngiltərə) - 3:1
Qollar: Mahrez, 73 (0:1), Rodriqo, 90 (1:1), 90+1 (2:1), Benzema, 95-pen. (3:1)
Baş hakim: Daniele Orsato (İtaliya)
Madrid, "Santyaqo Bernabeu" stadionu.
İlk oyun - 3:4
1news.az
