Deputat: “Sərhədin açılması və Ararat Mirzoyanın Türkiyəyə səfəri Ermənistana verilmiş növbəti bir şansdır”

“Uzun müddətdir ki, Türkiyə Azərbaycan və Ermənistanın iştirakı ilə münasibətlərin normallaşdırılması istiqamətində müəyyən addımlar atılır”.

Bunu 1news.az-a açıqlamasında Milli Məclisin deputatı Ceyhun Məmmədov deyib.

“Hətta Türkiyə ilə Ermənistanın rəsmi nümayəndələri bir neçə dəfə görüşdülər və fikir mübadiləsi apardılar. Burada bir neçə mühüm məsələ var. Azərbaycan tərəfi dəfələrlə bu məsələyə münasibətini bildirib ki, əgər Ermənistan işğala son qoyarsa, sülh müqaviləsi imzalayarsa, Azərbaycan tərəfi Türkiyə-Ermənistan münasibətlərinin normallaşmasına pis yanaşmır. Eyni məsələni Türkiyə tərəfi də dəfələrlə Ermənistanın nəzərinə çatdırıb. Hazırda münasibətlərin normallaşmamasının bilavasitə əsas səbəbkarı və günahkarı Ermənistandır. Çünki Ermənistan bu gün konstruktiv mövqe nümayiş etdirmir".

Deputat bildirib ki, Türkiyə-Ermənistan sərhədinin açılması və xarici işlər nazirinin səfərinin Ermənistana verilmiş növbəti bir şans olduğunu qeyd edib.

“Ermənistan bu şansdan düzgün istifadə etməyi bacarmalıdır və çalışmalıdır ki, münasibətlər qaydasına düşsün. Bu gün Ermənistan həm Azərbaycana qarşı düşmənçiliyi davam etdirir, həm Türkiyə ilə bağlı konstruktiv olmayan mövqe nümayiş etdirir.

Bu gün Ermənistanın daxilində bəziləri düşünürlər ki, sərhədlər açıldısa, bağlanmayacaq. Xeyr, elə deyil. Əgər Ermənistan eyni addımları atarsa, düşmənçiliyi davam etdirərsə, sərhəd açılmayacaq. Sərhədin davamlı açıq qalması Ermənistanın bu gündən sonra nümayiş etdirəcəyi mövqedən asılıdır. Ona görə də Ermənistanda olanlar indidən sevinməsinlər ki, onlar düşmənçiliyi davam etdirəcək, sülh müqaviləsi imzalamayacaqlar və bunlara baxmayaraq münasibətlər normallaşacaq.

Ermənistana verilən şanslar və edilən jestlər ona hesablanıb ki, Ermənistan öz mövqeyini düzəltsin və nəticə çıxartsın”.