“İnam Kərimovun şəxsi keyfiyyətləri, bacarığı və peşəkarlığı imkan verəcək ki...” - Elman Nəsirov
“Ölkə prezidentinin kadr siyasətində əsas tələbləri odur ki, ilk növbədə vətənpərvər olmalısan”.
Bunu Azərbaycan Milli Məclisinin deputatı Elman Nəsirov 1news.az-a İnam Kərimovun Ali Məhkəmənin sədri vəzifəsinə təyin edilməsi ilə bağlı açıqlamasında söyləyib:
“Həmçinin elmli, bilikli, savadlı olmalısan. Bundan savayı, peşəkar olmaq, milli-mənəvi dəyərlərə söykənmək, eyni zamanda ümumbəşəri dəyərlərə də hörmətlə yanaşmaq, xarici dilləri bilmək, müasir texnologiyalardan istifadə etməyi bacarmaq lazımdır. Bunlar çox mühüm dəyərlərdir və cənab prezident təyinat zamanı bunlara böyük diqqət ayırır. Ən əsas tələb xalqa ləyaqətlə xidmət etməkdir”.
Deputat qeyd edib ki, Ali Məhkəmənin sədri vəzifəsinə təyin olunan İnam Kərimovun təyinatına da bu prizmadan yanaşmaq lazımdır.
“İ.Kərimov Bakı Dövlət Universitetini beynəlxalq hüquq ixtisası üzrə bitirib, peşəkar hüquqşunasdır. Eyni zamanda Brüsseldə bakalavr təhsili alıb. Bundan savayı Fransada magistr təhsili alıb. Bunun ardınca da Sorbonna Universitetində doktorluq müdafiə edib. Öz Ana dilindən savayı ingilis, fransız və fars dillərini bilir. Eyni zamanda innovativ keyfiyyətlərə malik kadr kimi tanınıb. Xüsusilə də, 2012-ci ildə “ASAN xidmət”in fəaliyyətə başlaması məsələlərinə də o rəhbərlik edib. “ASAN xidmət” bu gün Azərbaycanın brendidir. Bu sahədə də İnam Kərimovun xidmətlərini xüsusi vurğulamaq lazımdır. Əsas odur ki, o kreativ düşüncəli, innovativ yanaşmalı xaraketerizə olunan bir kadr kimi cəmiyyətdə tanınır".
"Hesab edirəm ki, Ali Məhkəmənin hakimi vəzifəsinə təyinatı həm də cənab prezidentin ölkəmizdə həyata keçirdiyi hüquq-məhkəmə islahatlarının məntiqindən doğan bir addımdır" deyə, E.Nəsirov əlavə edib:
"Çünki 2018-ci ildə ölkə prezidenti növbəti dəfə xalqın etimadını qazanıb dövlətimizə rəhbərliyə başladıqdan sonra vurğuladı ki, bundan sonra ölkədə genişmiqyaslı islahatlara başlanılacaq və bu islahatların ən mühüm hissələrindən biri də məhkəmə hüquq sistemində islahatlardır. Hesab edirəm ki, həmin islahatların daha uğurlu həyata keçirilməsində Ali məhkəmənin sədrinin də üzərinə böyük məsuliyyət düşür. İnam Kərimovun şəxsi keyfiyyətləri, bacarığı və peşəkarlığı imkan verəcək ki, bu sahədə də islahatlar həyata keçirilməsinə Ali məhkəmənin hakimi olaraq o da öz töhfəsini versin".
