Deputat: “Dövlətimizə qarşı uzanmış xain əllərin qarşısını almaq təkcə qurumların işi deyil”
“Dövlət iki halda çox ciddi təzyiq altına düşə bilir. Bunu həm Azərbaycan praktikası, həm də beynəlxalq praktika təsdiqləyir”.
Bu sözləri Azərbaycan Milli Məclisinin deputatı Elman Nəsirov 1news.az-a xarici xüsusi xidmət orqanlarına işləyən vətəndaşlarımızın ifşası və həbs edilməsi ilə bağlı açıqlamasında söyləyib.
“Birincisi, dövlət zəif olanda çox ciddi təzyiq altında olur. Ayrı-ayrı ölkələrin xüsusi xidmət orqanları həmin ölkədə fəallaşmağa başlayır. Dövlət çevrilişi, hakimiyyətin zəbti kimi proseslər vüsət alır.
Nə qədər qəribə və paradoksal görünsə də dövlət güclü olanda da oxşar təhlükə və təhdidlərlə üz-üzə qala bilir. Bu gün biz güclü, Vətən müharibəsində zəfərə imza atmış qalib dövlətik. Buna görə dostlarımız sevinir. Bizi sevməyənlərin və bizə düşmən gözü ilə baxanların yuxularına haram qatılır. Onlar cürbəcür torlar hörməyə başlayırlar ki, Azərbaycanın bu tarixi zəfərinə kölgə salsınlar, zəfərin nəticələrinin qəbulu prosesinə mümkün qədər mane olsunlar. Bu məqsədlə də Azərbaycanı sevməyən dövlətlərin xüsusi xidmət orqanları fəallaşmağa başlayır. Çalışırlar ki, Azərbaycanın daxilində 5-ci kolon formalaşdırsınlar. Onun ayrı-ayrı üzvlərindən anti-Azərbaycan fəaliyyətində istifadə etsinlər. Cürbəcür vədlər, şirnikləşdirici addımlar hesabına onları dövlət əleyhinə təxribatçı davranışların həyata keçirilməsi prosesinə cəlb etsinlər".
Deputat son olaraq vətəndaşlarımızı ayıq-sayıq olmağa səsləyib.
“Hər bir Azərbaycan vətəndaşı bu reallığın fərqində olmalıdır. Xüsusilə də Azərbaycanın hüquq-mühafizə orqanları öz missiyasını şərəflə yerinə yetirirlər. Eyni sözləri Azərbaycan Respublikası Daxili İşlər Nazirliyi, Dövlət Təhlükəsizlik Xidməti haqqında da söyləyə bilərəm. Doğrudan da, hər iki qurumun rəhbərliyi öz missiyalarını çox şərəflə icra edirlər. Son həbslər də, ayrı-ayrı ölkələrin xüsusi xidmət orqanlarının ələ keçirdiyi insanların ifşa edilməsi, saxlanılması və həbsi bunu bir daha təsdiqləyir. Dövlətimizə qarşı uzanmış o xain əllərin vaxtında qarşısının alınmasında bizim müvafiq dövlət qurumlarımız, doğrudan da, çox fəaldır. Bu təkcə müvafiq dövlət qurumlarının işi deyil, bu məsələdə hər bir Azərbaycan vətəndaşı fəal olmalı, vətəndaş mövqeyi ortaya qoymalı, “bu mənim işim deyil” deyə düşünməməlidir. Əgər təhlükə hiss edirsə, təhlükə ilə bağlı müəyyən informasiyaya malikdirsə, bunu bildirməlidir. Vətəndaşlarımız hər zaman ayıq olmalıdır”.
