“Bu gün dünyada Azərbaycanı regionun aparıcı hərbi gücünə malik ölkə kimi tanıyırlar” - ŞƏRH
“Bizim bədnam qonşularımız 44 günlük müharibədən sonra öz hərbi gücünü artırmaq üçün çalışır”.
Bu sözləri 1news.az-a açıqlamasında ehtiyatda olan polkovnik-leytenant, hərbi ekspert Üzeyir Cəfərov deyib.
Ekpertin sözlərinə görə, bu gün dünyada Azərbaycanı regionun aparıcı hərbi gücünə malik ölkə kimi tanıyırlar:
“Hansı insanlar bu gün düşünür ki, Azərbaycan Vətən Müharibəsində qələbə qazandı, daha hərbi gücə ehtiyacı yoxdur, onlar böyük yanlış edirlər. Əksinə, Azərbaycan öz hərbi gücünü daha da artırmalı, üst mövqedə qalmaq üçün hərbi gücünü daha da inkişaf etdirməlidir. Ona görə ki, bu gün regionda çox ciddi hadisələr baş verir. Cənab Prezidentin dediyi kimi, yeni silahlar alınmalıdır. Bu gün dünyada Azərbaycanı regionun aparıcı hərbi gücünə malik ölkə kimi tanıyırlar. Hesab edirəm ki, Azərbaycan Silahlı Qüvvələri kifayət qədər güclü silahlara sahibdir. Biz bunu daha da inkişaf etdirməliyik ki, gələcəkdə hər hansısa ölkə Azərbaycana qarşı bir qərar verəndə və ya addım atanda ciddi olaraq düşünsün. Unutmayaq ki, bizim bədnam qonşularımız 44 günlük müharibədən sonra öz hərbi gücünü artırmaq üçün çalışır. Ermənistan həm də öz hərbi büdcəsini də artırıb”.
Ü.Cəfərov bildirib ki, son illər indiyə kimi Ermənistanın mütəffiqi olmayan ölkələrdən hərbi silah-sursatla özünü təmin edir:
“Bütün bunların fonunda sabah hansısa bir təhlükə baş versə, əlbəttə ki, hərbi gücümüzlə bunun qarşısını alacağıq. Ordunun modernləşdirilməsi prosesinin, islahatların davam etdirilməsi, müasir silah-sursat, hərbi texnika ilə təmin olunması bizi regiondakı ən güclü dövlətlərdən birinə çevirib. Azərbaycan özünü müstəqilliyini, seçimini, həyat tərzini, ərazi bütövlüyünü qorumaq üçün daha da güclü olmalıdır. Buna görə də müharibə başa çatandan sonra ardıcıl şəkildə bu istiqamətdə çox ciddi addımlar atıldı. Hələ də bu addımlar atılır və inkişaf etdirilir. Azərbaycan Silahlı Qüvvələrinin qüdrəti, ölkəmizin hərbi potensialı regionda öz maraqlarına uyğun siyasət yürütməsi, heç kimin qarşısında əyilməməsi və heç bir qüvvənin iradəsinə tabe olmaması Azərbaycanın gücü, qüdrəti bunu təmin edən əsas faktordur”.
