Yükərin qəbul edilməməsinə görə məsuliyyət tam şəkildə qondarma rejimin üzərinə düşür - Prezidentin köməkçisi
Dünən Azərbaycan tərəfi ilə Rusiya sülhməramlıları arasında təmaslar aparıldı.
1news.az Trend-ə istinadən xəbər verir ki, bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında deyib.
"Bu yüklərin Rusiya sülhməramlıların maşınana daşınaraq onların vasitəsilə aparılması məsələsi də müzakirə mövzusu idi. Lakin dünən kütləvi informasiya vasitələrində olan məlumatlar göstərdi ki, bəzi təşkil olunan aksiya vasitəsilə buna mane olmağa cəhd göstərirlər. Yüklərin buraya çatdırılması bir daha Azərbaycanın niyyətinin göstəricisidir. Amma yüklərin qəbul edilməməsi və imtina edilməsinə görə məsuliyyət tam şəkildə qondarma rejimin üzərinə düşür. Bu eyni zamanda Ermənistanın üzərinə də düşür ki, onlar da bu manipulyativ prossesdə öz rollarını oynamaqda davam etdirirlər", - deyə H. Hacıyev əlavə edib.
Qeyd edək ki, avqustun 29-da Azərbaycan Qızıl Aypara Cəmiyyəti (AzQAC) tərəfindən Qarabağda yaşayan erməni əsilli sakinlər üçün 40 ton un göndərilib. Yük avtomobilləri Rusiya sülhməramlılarının Ağdam-Xankəndi yolundakı postunda gözləyir. Ərzaq dolu yükün Xankəndiyə çatdırılmasına şərait yaradılması üçün Rusiya sülhməramlı kontingentinin komandanlığına müraciət olunub.
Azərbaycanda akkreditə olunmuş diplomatik korpusun nümayəndələri, hərbi attaşelər və xarici jurnalistlər avqustun 31-də Qarabağda yaşayan erməni əsilli şəxslərin ehtiyaclarını qarşılamaq üçün Azərbaycan Qızıl Aypara Cəmiyyəti tərəfindən təşkil olunan ərzaqdan ibarət yüklərin yerləşdiyi məntəqəyə gəliblər.
