Deputat: Xocalı soyqırımı qurbanlarının qanı yerdə qalmadı
“Barbar erməni xisləti tərəfindən törədilən, müasir dövrümüzün ən dəhşətli soyqırımlarından biri olan Xocalı faciəsindən 33 il ötür, 1992-ci il fevralın 25-dən 26-na keçən gecə yaddaşlara silinməz izlərlə həkk olundu”.
Bunu 1news.az-a açıqlamasında Milli Məclisin deputatı Naqif Həmzəyev deyib.
O, bildirib ki, Ermənistan silahlı qüvvələri beynəlxalq hüququn bütün norma və prinsiplərini tapdalayaraq, mühasirədəki Xocalıya ağır hərbi texnika yeridib, şəhərin dinc sakinlərinə misli görünməmiş qəddarlıqla divan tutdu.
“Barbarcasına yerlə-yeksan edilən şəhərdə 613 günahsız azərbaycanlı yalnız milli mənsubiyyətinə görə amansızcasına qətlə yetirildi. Xocalı faciəsi təkcə Azərbaycan xalqına deyil, bütövlükdə insanlığa qarşı törədilmiş ən ağır cinayətlərdən biri kimi tarixin qanlı səhifəsinə çevrildi. Bu faciənin qurbanları təkcə ölkə daxilində deyil, dünya miqyasında da ehtiramla anılır”.
“Xocalı faciəsinə hüquqi və siyasi qiymət ilk dəfə Ümummilli Lider Heydər Əliyevin Azərbaycanda siyasi hakimiyyətə qayıdışından sonra verildi” – deyə deputat əlavə edib:
“Heydər Əliyev həmin dövrdə ölkə rəhbərliyinin Xocalını tamamilə müdafiəsiz buraxmasını kəskin şəkildə tənqid edərək Azərbaycanın milli müstəqilliyinə qarşı xəyanətkar mövqe, konstitusion vəzifələrə biganə yanaşma, davamlı siyasi çəkişmələr, ölkədə hökm sürən anarxiya və daxili çəkişmələr bu faciənin qarşısının alınmasına mane olduğunu bildirib. Dörd tərəfdən düşmən qüvvələri tərəfindən mühasirəyə alınan Xocalının əhalisi uzun müddət yardım gözləsə də, real müdafiə imkanları olmasına baxmayaraq, faciənin qarşısını almaq üçün heç bir addım atılmayıb. Xocalı soyqırımı, Ermənistan silahlı qüvvələrinin Azərbaycana qarşı təcavüzünün ən ağır mərhələlərindən biri kimi, xalqın iradəsini sarsıtmaq, onun mübarizə ruhunu qırmaq və Qarabağın azərbaycanlı əhalisini məqsədyönlü şəkildə məhv etmək məqsədilə törədilmiş kütləvi qırğın aktıdır. Bu hadisə təkcə Azərbaycanın deyil, ümumilikdə bəşəriyyətin tarixində ağır bir cinayət kimi qalır”.
Deputat deyib ki, tarixi Zəfərimizdən sonra Azərbaycan xalqı Xocalı soyqırımının ildönümünü artıq fərqli kontekstdə anır.
“Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Ordumuzun işğal altındakı torpaqlarımızı azad etməsi ilə Xocalı faciəsi qurbanlarının, eləcə də Vətən uğrunda canından keçən digər şəhidlərimizin haqqının bərpa olunmasını təmin etdi. Bu qanlı faciənin qurbanlarının qisası alınaraq, ədalət yerini tapdı. Xocalıda yaradılması planlaşdırılan Soyqırımı Memorialı isə təkcə faciə qurbanlarının və Vətənin müdafiəsi uğrunda həlak olan qəhrəmanların xatirəsinə ehtiram ifadəsi deyil, həm də bu tarixi cinayət haqqında həqiqətlərin dünyaya çatdırılması və gələcək nəsillərin yaddaşında yaşadılması baxımından mühüm rol oynayacaq. Bu gün Xocalı qurbanlarının ruhu öz torpaqlarında ədalətin bərqərar olması ilə rahatlıq tapır.
Azərbaycan Respublikasının Prezidenti İlham Əliyev 15 oktyabr 2023-cü ildə Xocalı şəhərinə ilk səfərini etmişdir. Bu tarixi səfər zamanı Prezident Xocalı və Əsgəran qəsəbəsində Azərbaycan Respublikasının Dövlət Bayrağını ucaldaraq həmin ərazilərə baxış keçirmişdir. Bu hadisə, Xocalının dövlət suverenliyi altına qayıdışını simvolizə edən mühüm mərhələlərdən biri olmuşdur.
Daha sonra, 26 fevral 2024-cü ildə Prezident İlham Əliyev Xocalıya növbəti səfərini həyata keçirmişdir. Bu səfər çərçivəsində Xocalı Soyqırımı Memorialının təməli qoyulmuş və dövlət başçısı yerli əhali ilə görüşərək onların qayğı və ehtiyacları ilə maraqlanmışdır. Memorial kompleksi, Xocalı faciəsinin beynəlxalq səviyyədə tanıdılması və tarixi yaddaşın qorunması baxımından əhəmiyyətli bir layihə kimi qiymətləndirilir.
28 may 2024-cü ildə, Azərbaycan xalqı üçün mühüm əhəmiyyət daşıyan Müstəqillik Günündə, Xocalıya "Böyük Qayıdış" proqramı çərçivəsində ilk məcburi köçkün ailələrinin qayıdışı baş tutmuşdur. Bu gün Xocalının dirçəlişi və bərpası prosesinin başlanğıcı kimi qeyd edilmişdir. Dövlət başçısının rəhbərliyi ilə həyata keçirilən genişmiqyaslı infrastruktur layihələri sayəsində Xocalı sakinlərinin doğma yurdlarına qayıtması üçün zəruri şərait yaradılmışdır. Qeyd etmək lazımdır ki, bu proses hələ də davam etməkdədir”.
“19 fevral 2024-cü ildə Prezident İlham Əliyev Xocalı rayonunun Ballıca kəndinə səfər edərək burada məskunlaşan sakinlərlə görüşüb” – N.Həmzəyev əlavə edib:
“Görüş zamanı dövlət başçısı kəndin yenidən qurulması və burada yaradılan şərait barədə fikir mübadiləsi aparıb. Prezident sakinlərin qayğı və ehtiyaclarını dinləyərək onların rahat yaşayışı üçün görüləcək əlavə tədbirlərlə bağlı tapşırıqlar verib. O, həmçinin Xocalı rayonunun digər kənd və qəsəbələrində aparılan bərpa işlərinin əhəmiyyətini vurğulayaraq, bölgənin sürətli inkişafı üçün atılan addımların davam edəcəyini bildirib. Bu görüş Ballıca kəndinin dirçəlişinin və məcburi köçkünlərin doğma yurdlarına qayıdış prosesinin dövlət siyasətinin əsas prioritetlərindən biri olduğunu bir daha nümayiş etdirdi.
Xocalı faciəsi və ümumilikdə Azərbaycana qarşı törədilmiş soyqırımlar və hərbi cinayətlərə görə məsuliyyət daşıyan cinayətkarlar Azərbaycan qanunvericiliyinə uyğun olaraq məhkəmə qarşısında cavab veriblər. Bu, Azərbaycanın hüquqi suverenliyinin, ədalət prinsiplərinə sadiqliyinin və eyni zamanda, dövlətin gücünün bariz nümunəsidir. Həyata keçirilən hüquqi proseslər ədalətin bərpasına, beynəlxalq hüquq normalarının təmin olunmasına və Azərbaycanın qətiyyətli mövqeyinin dünyaya nümayiş etdirilməsinə xidmət edir”.
