Metro gücləndirilmiş rejimə keçir
Bu gün UEFA Çempionlar Liqası çərçivəsində Bakıda keçiriləcək “Qarabağ” (Azərbaycan) - APOEL (Kipr) oyunu ilə əlaqədar olaraq metroda sərnişinlərin rahatlığı və təhlükəsizliyini təmin etmək məqsədilə bütün lazımi tədbirlər görülüb.
1news.az-ın verdiyi xəbərə görə, bunu “Bakı Metropoliteni” Qapalı Səhmdar Cəmiyyətinin (QSC) mətbuat xidmətinin rəhbəri Bəxtiyar Məmmədov deyib.
Onun sözlərinə görə, xüsusən “Gənclik”və “Nəriman Nərimanov” stansiyaları üçün əlavə işçi qüvvəsi ayrılıb:
“Bütün təhlükəsizlik tədbirlər görülüb ki, sərnişinlər oyunu izləməyə gedəndə və gələndə tam rahat şəkildə metrodan istifadə etsinlər. Metro saat 00:00-a kimi açıq olacaq. Çünki oyun saat 22:00-da bitəcək”.
Qeyd edək ki, oyun bu gün Bakı vaxtı ilə 20:30-da Tofiq Bəhramov adına Respublika Stadionunda baş tutacaq.
S.Xankişiyeva
