“Azercell Telekom” 4G şəbəkəsinin genişləndirilməsi istiqamətində iş aparır
“Azercell Telekom” şirkəti 4G şəbəkəsinin genişləndirilməsi istiqamətində iş aparır.
1news.az AZƏRTAC-a istinad edərək xəbər verir ki, şirkətin icraçı direktoru Vahid Mürsəliyev yaxın gələcəkdə bu texnologiya əsasında səsli xidmətlər göstərməyin mümkün olacağını bildirib.
Dünyanın aparıcı mobil operatorlarının GSM texnologiyasından istifadəni dayandıracaqları barədə proqnozlarını şərh edərək V.Mürsəliyev deyib ki, yeni texnologiyaların yayılması nəticəsində tələbat olmadığı halda GSM-dən imtina təbii qarşılanmalıdır.
“Azercell” şirkətinin icraçı direktoru, eyni zamanda, WhatsApp və Viber kimi əlavə mobil proqramlarla rəqabət yolunu şirkət tərəfindən yeni aplikeyşenlərin hazırlanmasında görür. Onun fikrincə, getdikcə güclənən rəqabətə yalnız bu yolla davam gətirmək mümkündür.
1news.az
