Azərbaycan prezidenti İlham Əliyev Türkiyə dövlət başçısı Rəcəb Tayyib Ərdoğana başsağlığı verib

Azərbaycan prezidenti İlham Əliyev Türkiyə prezidenti  Rəcəb Tayyib Ərdoğana İstanbulda törədilmiş partlayış nəticəsində insanların həlak olması ilə əlaqədar başsağlığı verib.

1news.az Azərbaycan prezidentinin rəsmi saytına istinadən başsağlığı məktubunu təqdim edir:

Hörmətli cənab Prezident,

Əziz Qardaşım,

İstanbulun Sultanəhməd meydanında törədilmiş partlayış nəticəsində insanların həlak olması və yaralanması xəbərindən olduqca sarsıldıq.

Biz bu amansız terror aktından son dərəcə hiddətlənir, terrorizmin bütün təzahürlərinə qarşı ən kəskin şəkildə və hamılıqla mübarizə aparılmasını zəruri hesab edirik.

Baş vermiş bu faciə ilə əlaqədar Sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından dərin hüznlə başsağlığı verir, yaralananlara və xəsarət alanlara şəfa diləyirəm.

Allah rəhmət eləsin!

1news.az