Azərbaycanda daha iki bankın lisenziyası ləğv edildi

Mərkəzi Bank (MB) Azərbaycanda daha iki bankın lisenziyasını ləğv edib.

1news.az-ın MB-a istinadən verdiyi xəbərə görə, MB-ın İdarə Heyətinin 27 yanvar 2016-cı il tarixli, 07/1 və 07/3 nömrəli qərarları ilə məcmu kapitalın minimum məbləği tələbinə əməl etmədiyinə, kreditorları qarşısında öhdəliklərini icra edə bilmədiyinə, cari fəaliyyətini etibarlı və prudensial qaydada idarə etmədiyinə görə “Qafqaz İnkişaf Bankı” ASC və “Atrabank” ASC-nin bank lisenziyaları ləğv edilib.

“Banklar haqqında” Azərbaycan Respublikası Qanununun 51-ci və 52-ci maddələrinə uyğun olaraq 27.01.2016-cı il tarixdən banklara müvəqqəti inzibatçı təyin edilib.

MB bildirir ki, “Qafqaz İnkişaf Bankı” ASC və “Atrabank” ASC Əmanətlərin Siğortalanması Fonduna üzv banklardır və Fond tərəfindən əhalinin qorunan əmanətləri üzrə qanunvericiliyə müvafiq olaraq kompensasiyaların ödənişi həyata keçiriləcək.

Qeyd edək ki, cari ayda Qafqaz İnkişaf Bankı və AtraBankdan əlavə Mərkəzi Bank Daha 4 bankın: United Credit Bank, NBCBank, Bank of Azerbaijan və Gəncəbank-ın lisenziyalarını ləğv edib.

“Qafqaz İnkişaf Bankı” ASC 7 aprel 1997-ci ildə Qafqaz ölkələrinin sosial-iqtisadi inkişafının sürətləndirilməsi məqsədi ilə Azərbaycan, ABŞ, Almaniya, Gürcüstan, Rusiya vətəndaşlarının, təşkilatlarının, banklarının və müəssisələrinin dəstəyi ilə yaradılıb.

1992-ci ildə yaradılan AtraBank ASC ilk dəfə kommersiya- aksioner bankı olaraq yaradılıb. “AtraBank” ASC 29 avqust 2005-ci ilə kimi fəaliyyət göstərib. Bankın aksiyaçıları Azərbaycandan olan 30-dan çox fiziki şəxsdir.

Beləliklə, hal-hazırda bank fəaliyyəti ilə bağlı lisenziyaya malik olan 37 bank var.

1news.az