Nazir Ancelino Alfano: “Şengenin ləğvi İtaliyaya böyük zərər vura bilər”
“Şengen sisteminin saxlanılması üçün Avropa təcili tədbirlər görməlidir. Əks halda, xaotik vəziyyət yaranar və bu sazişin ləğvi İtaliyaya da böyük zərər vura bilər”.
Bu sözləri İtaliyanın daxili işlər naziri Ancelino Alfano yerli “La Stampa” qəzetinə müsahibəsində deyib.
Nazir bildirib ki, müvafiq addım “Balkan marşrutu” ilə Avropaya daxil olmaq istəyən miqrantların işini çətinləşdirər və dəniz vasitəsilə İtaliyaya gələn sığınacaq axtaranların sayının kəskin artmasına səbəb olar:
“İtaliyanın Şengenin ləğvi ilə razılaşacağını düşünənlər anlamalıdırlar ki, biz Adriatik və ya Aralıq dənizi sahillərinə tikanlı məftillər taxa bilmərik. Bu addımın vuracağı iqtisadi zərər çox böyük ola bilər”.
Qeyd edək ki, BMT-nin Qaçqınlar üzrə Ali Komissarlığı 2015-ci ildə dəniz vasitəsilə İtaliyaya 153 min sığınacaq axtaranın gəldiyini bildirib. Onların çoxu daha sonra səfərlərini Fransaya və Şimali Avropaya doğru davam etdiriblər.
AZƏRTAC
