Xəzərin Türkmənistan sahillərində tapılan cəsədin şəxsiyyəti müəyyənləşdirilib - YENİLƏNİB
Yanvarın 29-da Xəzər dənizinin Türkmənistan sahillərində tapılan cəsədin şəxsiyyəti artıq müəyyənləşib.
“Azneft” İstehsalat Birliyindən (İB) AZƏRTAC-a bildiriblər ki, o, keçən il dekabrın 4-də “Günəşli” yatağındakı 10-cu dərin dəniz özülündə baş vermiş qəza nəticəsində itkin düşmüş “SOCAR CAPE”nin işçisi, 1973-cü il təvəllüdlü Sahib Güloğlan oğlu Şahmarovdur.
Həlak olmuş neftçinin şəxsiyyətini Fövqəladə Hallar Nazirliyinin “BE-200ÇS” amfibiya tipli təyyarəsi ilə Türkmənistana gedən istintaq qrupu və “Azneft” İB-nin işçiləri müəyyənləşdiriblər.
20:19
Xəbər verdiyimiz kimi, yanvarın 29-da Xəzər dənizinin Türkmənistan sahillərində tapılmış meyitin, ilkin olaraq, “Günəşli” yatağındakı 10 saylı dərin dəniz özülündə baş vermiş qəza nəticəsində itkin düşənlərdən biri olduğu ehtimal edilir.
Fövqəladə Hallar Nazirliyinin mətbuat xidmətindən AZƏRTAC-a bildiriblər ki, bununla əlaqədar nazirliyin “BE-200ÇS” amfibiya tipli təyyarəsi cəsədin tanınması və respublikaya gətirilməsi məqsədilə yanvarın 30-da istintaq qrupu ilə birgə Türkmənistana yola düşüb.
13:00
"Günəşli" yatağının 10-cu dərin dəniz özülündə baş vermiş qəzada itkin düşənlərdən daha birinin meyiti tapılıb.
APA-nın FHN-in saytında istinadən verdiyi məlumata görə, yanvarın 29-da Xəzər dənizinin Türkmənistan sahillərində tapılmış meyitin, ilkin olaraq, “Günəşli” yatağındakı 10 saylı dərin dəniz özülündə baş vermiş qəza nəticəsində itkin düşənlərdən biri olduğu ehtimal edilir.
Bununla əlaqədar, Fövqəladə Hallar Nazirliyinin “BE-200ÇS” amfibiya tipli təyyarəsinin istintaq qrupu ilə birgə cəsədin tanınması və respublikaya gətirilməsi məqsədilə Türkmənistana göndərilməsi üçün hazırlıq işlərinə başlanılıb.
Qeyd edək ki, 10-cu dərin dəniz özülündə qəza ötən il dekabrın 4-də baş verib. Qəza baş verən zaman platformada olan 63 işçidən 33 nəfəri xilas olub, 11 nəfəri həlak olub və 19 nəfəri itkin düşüb.
