Avstriyada işsizlərin sayı ən yüksək həddə çatıb

Avstriyada məşğulluq bazarında vəziyyət getdikcə gərginləşib və işsizlərin sayı son illərdə ən yüksək həddə çatıb.

1news.az-ın AZƏRTAC-a istinadla verdiyi xəbərə  görə, bu ilin yanvar ayının göstəricilərinə əsasən, ölkədə 490 246 nəfər işsiz var. Bununla da Avstriyanın əmək qabiliyyətli əhalisinin 10,9 faizi iş axtarışındadır. Ötən ilin müvafiq dövrü ilə müqayisədə ölkədə işsizlərin sayı 3,7 faiz və ya 17 700 nəfər artıb. İşsizlərin əsas hissəsi ölkə paytaxtı Vyananın payına düşür, burada 166 min nəfər Əmək Məşğulluğu Xidmətində qeydiyyatdadır.

Ekspertlərin rəyinə görə, tezliklə işsizlərin sayı 500 minlik psixoloji sərhədə çatacaq. İş axtaranların əsas hissəsi sosial xidmət, pərakəndə satış və turizm sektorlarında çalışanlardır.

Ölkənin sosial məsələlər naziri Alois Ştöqer iş bazarındakı mənfi tendensiyanın qarşısının alınmasının hələlik mümkün olmadığını bildirib. Ölkəyə gələn qaçqınlar, işini itirmiş yaşlı insanların məşğulluq bazarında yenidən iş tapmaq şanslarının aşağı olması və nəhayət dünyadakı qlobal iqtisadi proseslər yaxın aylarda işsizlərin sayının artmasına təkan verəcək amillərdir.

1news.az