Ərdoğan: “Suriya problemi həll edilməyənədək bölgədə dinclik olmayacaq”
“Suriya problemi həll edilməyənədək bölgədə dinclik olmayacaq”.
1news.az-ın Anadolu agentliyinə istinadən verdiyi xəbərə görə, bunu Ekvadorda səfərdə olan Türkiyə prezidenti Rəcəb Tayyib Ərdoğan deyib.
“Bizim avropalı dostlarımız istəyirlər ki, Türkiyə qaçqın axınını dayandırsın. Axı hava zərbələri endirilərkən, biz bunu necə dayandıra bilərik?”, - deyə Ərdoğan bildirib.
Türkiyə prezidenti milyonlarla suriyalı qaçqının problemlərinin həllinə və ölkənin mədəni irsinin çoxsaylı abidələrinin dağıdılmasının qarşısının alınmasına laqeyd yanaşdıqlarına görə BMT-nin təhsil, elm və mədəniyyət təşkilatı olan YUNESKO və BMT-nin YUNİSEF Uşaq Fondu daxil olmaqla, beynəlxalq qurumları tənqid edib.
“Bizim region ağır dövrünü yaşayır, Suriyadakı böhran İkinci Dünya Müharibəsi dövründən bu vaxtadək ən böyük insanlıq faciəsi yaradıb”, - deyə Ərdoğan bildirib.
Qeyd edək ki, Türkiyə 2,7 milyon suriyalı qaçqını qəbul edib.
1news.az
