Cəlilabadda əmək yarmarkası keçirilib

Cəlilabad Rayon Təhsil İşçiləri Evində növbəti əmək yarmarkası keçirilib.

Cəlilabad Rayon İcra Hakimiyyəti və Rayon Məşğulluq Mərkəzinin birgə təşkil etdiyi yarmarkaya rayonun 35 müəssisə və təşkilatından 600 vakant iş yeri çıxarılıb.

Tədbirdə çıxış edən rayon icra hakimiyyətinin başçısı Əziz Əzizov bildirib ki, dünyada hökm sürən iqtisadi böhran Azərbaycana da mənfi təsirini göstərib. Prezident İlham Əliyevin həyata keçirdiyi antiböhran tədbirləri Cəlilabadda əhali tərəfindən razılıqla, nikbin əhval-ruhiyyə ilə qarşılanır.

Ə.Əzizov qeyd edib ki, dövlətimizin başçısı süni qiymət artımının qarşısını qətiyyətlə almaq üçün təxirəsalınmaz tədbirlər görür, bu məqsədlə fərman və sərəncamlar imzalayır.

Boş qalmış əkinəyararlı torpaq sahələrinin birləşdirilərək iri fermer təsərrüfatlarının yaradılmasının, kəndlərdə mövcud potensialın hərəkətə gətirilməsinin, ondan düzgün istifadənin vacibliyini qeyd edən icra hakimiyyətinin başçısı, rayonda əməktutumlu sahələrin inkişaf etdirilməsinin yerli əhalinin məşğulluğunun təmin olunmasında mühüm əhəmiyyəti olacağını diqqətə çatdırıb.

Rayon ağsaqqalları və ziyalıları çıxış edərək Azərbaycan Prezidenti İlham Əliyevin siyasətini, onun həyata keçirdiyi antiböhran tədbirlərini hamılıqla dəstəklədiklərini bildiriblər.

Əmək yarmarkasına çıxarılan boş iş yerləri üçün minimum əməkhaqqı 150 manat, maksimum əməkhaqqı isə 450 manat təşkil edib.

Yarmarkada 395 nəfərə müvafiq iş yerlərinə göndəriş verilib, 21 nəfər isə peşə hazırlığı kurslarına cəlb olunub.