Azərbaycan AŞPA-da Dağlıq Qarabağla bağlı qətnamənin qəbul olunmamasında ABŞ Dövlət Departamentinin rolunu araşdırır

Azərbaycanın Vaşinqtondakı səfirliynə AŞPA-da Dağlıq Qarabağla bağlı qətnamənin qəbul olunmamasında ABŞ Dövlət Departamentinin iştirakı ilə əlaqədar sorğu göndərilib.

1news.az-ın verdiyi xəbərə görə, bu haqda çərşənbə günü jurnalistlərlə mətbuat konfransı zamanı xarici işlər naziri Elmar Məmmədyarov bildirib.

Nazir qeyd edib ki, Azərbaycan XİN-i bu haqda məlumat aldıqdan sonra xəbərə aydınlıq gətirəcək.

Xatırladaq ki, ABŞ Dövlət Departamentinin nümayəndələrinin AŞPA-nın Parlament Assambleyasında Dağlıq Qarabağ münaqişəsi ilə bağlı qətnamənin qəbul olunmamasında birbaşa iştirak ediblər. Bu haqda amerikalı konqresmen Adam Şiff erməni nəşri olan “Asbarez”ə müsahibəsində bildirib.

“ABŞ Dövlər Departamentinin Regional məsələlər üzrə səfiri  və dövlət katibinin köməkçisi Viktoriya Nuland da bu qətnamənin əleyhinə çıxış ediblər”, - o, bildirib.

Yanvarın 26-da AŞPA-nın qış sessiyasının əsas mövzusuna Dağlıq Qarabağla bağlı iki qətnamənin qəbulu səsverməyə qoyulmuşdu.

Bu qətnamələrdən biri Robert Volterin hazırladığı “Dağlıq Qarabağ və Azərbaycanın işğal olunmuş digər ərazilərində zorakılıq hallarının artması”, digəri isə Militsa Markoviçin hazırladığı Azərbaycanın sərhədyanı rayonlarının sakinlərinin qəsdlə içməli sudan məhrum edilməsi” layihələridir.

Hər iki sənəddə Ermənistan işğalçı ölkə kimi göstərilib.

1news.az