İndoneziyanın hakimiyyət orqanları Sumatranın üç əyalətində fövqəladə vəziyyət elan edib

İndoneziyanın hakimiyyət orqanları güclü daşqınlar səbəbindən Sumatra adasının doqquz əyalətindən üçündə fövqəladə vəziyyət elan edib. Təbii fəlakət nəticəsində 43 nəfərin həlak olduğu bildirilir.

1news.az-ın AZƏRTAC-a istinadla verdiyi xəbərə görə, bu barədə “Straits Times” qəzetinə müsahibəsində Fəlakətlərin Qarşısının Alınması Milli Agentliyinin rəsmi nümayəndəsi Sutoro Purvo Nuqhoro məlumat verib.

Agentliyin nümayəndəsinin sözlərinə görə, ölkənin digər rayonlarında da daşqınlar təhlükəsi var. Buna görə də müvafiq dövlət xidmətləri yüksək hazırlıq vəziyyətindədirlər. S.P.Nuqhoro, həmçinin bildirib ki, əhalinin təxliyyəsi, müvəqqəti sığınacaqların inşası və digər ehtiyaclar üçün hökumət tərəfindən 11 milyon dollar vəsait ayrılıb.

Yerli hökumət orqanlarının məlumatına görə, Banqka-Belitunq, Qərbi Sumatra və Riau əyalətlərində güclü yağışlar nəticəsində yaranan təhlükə səbəbindən 100 mindən çox insan evlərini tərk edib.

Hazırda İndoneziyanın bir çox rayonlarında ötən ilin noyabrından başlayan güclü yağışlar hələ də davam edir. Ekspertlərin qənaətinə görə, bu daşqınlar son 30 ildə ən güclü təbii fəlakətdir.

1news.az