Nizami Kino Mərkəzinə direktor təyin olunub

11 fevral 2016-cı il tarixindən etibarən Leyli Şəmsəddin qızı Mirzəyeva Nizami Kino Mərkəzinin direktor vəzifəsinə təyin olunub.

1news.az-ın Mədəniyyət və Turizm Nazirliyinin saytına istinadən verdiyi xəbərə görə, təyinat nazir Əbülfəs Qarayevin müvafiq əmrinə əsasən həyata keçirilib.

Qeyd edək ki, Leyli Mirzəyeva Bakı Musiqi Akademiyasının məzunudur. Müxtəlif dövrlər ərzində O, “Kainat” Gənclik Mərkəzinə layihələr üzrə koordinator, Nizami Kino Mərkəzində marketinq şöbəsinin müdiri və kino işləri üzrə direktor müavini vəzifələrində çalışıb.

1news.az