Parlament komitəsi 2016-cı ilin dövlət büdcəsinə düzəlişlər layihəsini qəbul edib

İqtisadi siyasət, sənaye və sahibkarlıq üzrə parlament komitəsi 2016-cı ilin dövlət büdcəsinə düzəlişlər layihəsini qəbul edib və sənədi parlamentin plenar iclasında müzakirə etməyi tövsiyə edib.

1news.az-ın İnterfaks-Azərbaycan agentliyinə istinadla verdiyi xəbərə görə, parlamentdən verilən məlumata görə, bu qərar komitənin cümə günü keçirilən iclasında qəbul edilib.

Düzəlişlər layihəsini maliyyə naziri Samir Şərifov təqdim edib.

Düzəlişlərə əsasən, 2016-cı il dövlət büdcəsinin gəlirləri 2 mlrd. 256 mln. manat və ya 15,5% - 16 mlrd. 822 mln. manata qədər, xərcləri 13,7% - 18 mlrd. 495 mln. manata qədər artacaq, kəsir 1 mlrd. 673 mln. manat təşkil edəcək.

Gəlirlərin strukturunda Vergilər Nazirliyinin planının 6,2% - 7 mlrd. 10 mln. manata qədər, Dövlət Gömrük Komitəsinin xətti ilə daxilolmaların 13,8% - 1 mlrd. 810 mln. manata qədər artırılması təklif olunur.

Dövlət Neft Fondundan transfertlər 1 mlrd. 615 mln. manat və ya 26,9% - 7 mlrd. 615 mln. manata qədər artacaq. ARDNF-in transfertləri cari ildə dövlət büdcəsinin gəlirlərinin 45,3%-ni təmin edəcək. Dövlət büdcəsinin digər gəlirləri 13 mln. manat artacaq.

Əlavə xərclərin strukturunda sosial tədbirlərin maliyyələşdirilməsinə 1 mlrd. 290 mln. manat yönəldiləcək.

Düzəlişlər nəzərə alınmaqla, ümumilikdə 2016-cı ildə dövlət büdcəsinin xərclərinin 65,5%-ni cari, 24,9%-ni əsaslı xərclər, 9,6%-ni dövlət borcuna xidmətlə bağlı xərclər təşkil edəcək.

Dövlət büdcəsinə edilən düzəlişlərdə neftin bir barelinin qiyməti 25 dollardan hesablanıb, baxmayaraq ki, dövlət büdcəsi neftin bir barelinin qiyməti 50 dollar olmaqla təsdiq edilmişdi.

Parlament düzəlişlər layihəsinə fevralın 23-də keçiriləcək plenar iclasda baxacaq.

2016-cı ildə dövlət büdcəsinin gəlirləri 14 mlrd. 566 mln. manat, xərcləri 16 mlrd. 264 mln. manat, kəsiri 1 mlrd. 698 mln. manat səviyyəsində təsdiq edilib.

1news.az