Maroş Şevçoviç Avropanın enerji təhlükəsizliyində “Cənub Qaz Dəhlizi” layihəsinin vacibliyini vurğulayıb
Avropa Komissiyasının enerji ittifaqı üzrə vitse-prezidenti Maroş ŞevçoviçAvropanın enerji təhlükəsizliyində “Cənub Qaz Dəhlizi” layihəsinin vacibliyini vurğulayıb.
“Mən, ötən il ərzində bu cür strateji infrastruktur layihələrində əldə olunan tərəqqini alqışlayıram”, - deyə, M.Şevçoviç özününTwitter səhifəsində qeyd edib.
Eyni zamanda o, “Cənub Qaz Dəhlizi” layihəsinin Məşvərət Şurasının II iclası ilə bağlı Bakıda olduğunu qeyd edib.
“Əldə olunmuş nailiyyətlərin yekunu ilə bağlı bir ildən sonra qayıtmağıma şadam” - Avropa Komissiyasının enerji ittifaqı üzrə vitse-prezidenti qeyd edib.
Qeyd edək ki, fevralın 29-da Bakıda “Cənub Qaz Dəhlizi” layihəsinin Məşvərət Şurasının II iclası keçirilib. Azərbaycan Prezidenti İlham Əliyevin də qatıldığı toplantıda layihənin iştirakçısı olan ölkələrin – Azərbaycan, Türkiyə, Gürcüstan, Yunanıstan, Albaniya, İtaliya, Bolqarıstan, Xorvatiya, Serbiya, Monteneqronun enerji nazirlərinin rəhbərlik etdiyi nümayəndə heyətlərinin, ABŞ, Avropa İttifaqı və Böyük Britaniyanın yüksək vəzifəli şəxslərinin, habelə Transanadolu Boru Kəməri (TANAP) və Transadriatik Boru Kəməri (TAP) layihələrinin və beynəlxalq maliyyə təşkilatlarının rəhbərlərinin iştirakı nəzərdə tutulub.
Tədbirə həmçinin ABŞ Dövlət Departamentinin beynəlxalq enerji məsələləri üzrə xüsusi nümayəndəsi və əlaqələndiricisi Amos Hokstayn, Avropa İttifaqının (Aİ) xarici əlaqələr və təhlükəsizlik siyasəti üzrə ali nümayəndəsi Federika Mogerini, həmçinin Avropa Komissiyasının enerji birliyi üzrə vitse-prezidenti Maroş Şevçoviç də iclasa qatılıb.
İclas üç plenar sessiya və dəyirmi masadan ibarət olacaq.
Tədbirin yekununda “Cənub Qaz Dəhlizi” Məşvərət Şurası çərçivəsində nazirlərin görüşünün iştirakçıları tərəfindən Birgə Bəyannamə imzalanacaq.
1news.az
