Bakı şəhər Yol Polis İdarəsi: “Pəncərədən maşına daxil olan polis xəstəxanadadır”-VİDEO-YENİLƏNİB
Bakı şəhər Dövlət Yol Polisi İdarəsi Xətayi rayonunda qadın sürücü və polis əməkdaşı arasında baş verən insidentlə əlaqədar operativ araşdırma aparıb.
1news.az-a Bakı Dövlət Yol Polisi İdarəsinin İctimaiyyətlə əlaqələr şöbəsinin rəhbəri polis polkovniki Vaqif Əsədovun verdiyi məlumata görə, adı çəkilməyən qadın sürücü yol hərəkəti qaydalarını kobud surətdə pozub.
“Bunu görən Yoll Polisi ondan dayanmağı tələb etsə də, qadın polisin qanuni tələbinə məhəl qoymayıb. O zaman avtomobil məcburi olaraq saxlanılıb. Lakin sürücü avtomobili blok edib və sənədləri təqdim etməyib.
Daha sonra avtomobildən düşən qadın polisə müqavimət göstərib. Polis əməkdaşının üzünü yaraladığına görə o, hazırda xəstəxanadadır. İşlə bağlı materiallar məhkəməyə göndərilib və qadın sürücü 200 manat məbləğində cərimə olunub. Onların digər davranışlarına da hüquqi qiymət verilir”,- V.Əsədov bildirib.
Onun səzlərinə görə hadisənin baş vermə səbəbi qadın sürücünün qanuna zidd davranışları və polis əməkdaşının qanuni tələblərini yerinə yetirməməsi olub.
1news.az
11:53
Bakıda Yol Polisi inspektoru ilə qadın sürücü arasında növbəti insident baş verib.
1news.az xəbər verir ki, Xətayi rayonundakı S.Vəzirov küçəsində Dövlət Yol Polisi Patrulu (BMW, 99-YP-497) qayda pozuntusuna görə KIA Picanto (99-FH-475) avtomobilinin sürücüsü olan qadını saxlayıb.
Polis qadını sərxoş olduğundan şübhələnərək ondan alkotest keçməsini tələb edib, lakin sürücü razılaşmayıb. Bundan əlavə qadın maşını evakuasiya etmək istədikdə polisə müqavimət göstərib.
Polis isə buna cavab olaraq qadını yerə itələyib və sürücü tərəfindən bloka salınan maşının pəncərəsindən işəri daxil olub. Bu konflikti kənardan izləyən digər polis əməkdaşı və ətrafdakı insanlar hadisəyə müdaxilə etməyib.
Videonu şərh edərkən Bakı şəhəri Dövlət Yol Polisi İdarəsindən bizə bildirilib ki, faktla bağlı araşdırma aparılır. Sonda baş verənlərə hüquqi qiymət veriləcək və günahkarlar həbs olunacaqlar.
Xatərladaq ki, bu günlərdə Bakıda digər insident zamanı qadın sürücü maşını ilə birlikdə evakuasiya olunub.
1news.az
Video – Аvtosfer.az
