​ TAP-ın çəkilişi üçün tenderin qalibi elan edilib

Trans-Adriatik Boru Kəməri (TAP) layihəsi üzrə Albaniya və Yunanıstanın quru ərazisində (onshore) tikinti işlərinin aparılması ilə bağlı tenderin qalibi müəyyən edilib.

1news.az “Report”a istinadən xəbər verir ki, bu barədə "TAP AG"-dən məlumat verilib.

Məlumata görə, 5 lot üzrə keçirilən tenderin üç lotu Yunanıstan, iki lotu isə Albaniya ərazisini əhatə edir. TAP-ın hər iki ölkənin ərazisində mühəndislik, tədarük və tikinti (EPC) işlərinin görülməsini özündə cəmləşdirən bu tenderdə ümumilikdə 48 düyümlük (1,2 metr) borular 760 km ərazidə çəkilməlidir.

Tenderin iki lot üzrə qalibi İtaliyanın "Bonatti S.p.A." şirkəti ilə Yunanısytanın "J&P AVAX S.A." şirkətinin ortaq müəssisəsidir ki, bu müəssisə Şimali Yunanıstanda fəaliyyətini reallaşdıracaq. Ortaq şirkət ümumilikdə 360 km ərazidə EPC fəaliyyətini həyata keçirəcək ki, bu da Kavala ilə Albaniya sərhəddində yerləşən Yeropiqi (Ieropigi) arasındakı əraziləri əhatə edir.

Tenderin ikinci qalibi isə Fransanın "Spiecapag" şirkətidir və bu şirkət ümumilikdə 400 km ərazidə EPC ilə məşğul olacaq ki, onun da 185 km-i Yunanıstan, qalan 215 km-i isə Albaniya ərazisinə düşür.

Adıçəkilən şirkət Yunanıstan ərazisndə Kipoy və Kavala, Albaniya ərazisində isə Bilişt (Bilisht) və Topoe (Topoje) arasındakı ərazilərdə kəmərin çəkilişini həyata keçirəcək.

Müqavilənin şərtlərinə görə, podratçılar işlərə 2016-cı ilin II rübündə səfərbər olunacaq, TAP-ın layihəsinə görə isə kəmərin çəkilişinə bu ilin ortasında başlanacaq.

Qeyd edək ki, TAP-ın 5 səhmdarı var ki, onlardan SOCAR, BP, "Snam S.p.A"ın hər birinin 20%, "Fluxys"in 19%, "Enagas"ın 16% və "Axpo"nun 5% paya sahibdir.