Mübariz Əhmədoğlu: “Ermənistan işğal etdiyi Azərbaycan ərazilərinin bir qismi üzərindən nəzarətini itirdi”

“Azərbaycan Prezidentinin İrana səfəri zamanı “Xudafərin” hidroqovşağının birgə istismarı ilə bağlı müqavilə imzalandı. Bu müqavilənin hazırlanması dövründə İran tərəfi həmin ərazidəki erməni hərbi birləşmələrinin oradan uzaqlaşmağa vadar etmişdi. Bu gün erməni hərbçiləri həmin ərazilərə heç bir  şərtlə qayıda bilməzlər”.

Bu sözləri 1news.az-a Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu bildirib.

M.Əhmədoğlu qeyd edib ki,İran faktiki olaraq təkbaşına Dağlıq Qarabağ tənzimlənməsində praktiki mərhələnin bünövrəsini qoydu:

“Bu, həm də İranın regionda nüfuzunu artırmaq uğrunda mübarizənin yeni mərhələsinin başlanğıcı idi”.

Politoloq Ermənistanın işğal etdiyi ərazilərinin bir qismi üzərində nəzarətini itirməsi barədə Azərbaycan mətbuatında yayımlanan xəbərlərə də aydınlıq gətirib:

“Ermənistan işğal etdiyi ərazilərin bir qismi üzərində nəzarətini itirməsi barədə məlumatın Azərbaycan mətbuatında yayımlanması Rusiyada fəallıq yaratdı. RF baş nazirinin müavini D.Roqozin sanballı nümayəndə heyəti ilə Azərbaycana səfər etdi. Azərbaycanla Rusiya arasında hərbi-texniki və digər sahələrdə əməkdaşlığın artan xətlə bundan sonra da inkişafına dair təminat aldı.

Rusiyanınxarici işlər nazirinin müavini Qriqori Karasin Tehrana və cəmi iki gün fasilə ilə Bakıya səfər etdi. Q.Karasin MDB məkanındakı münaqişələrin kuratorudur. Tehrandan qayıtdıqdan sonra o, bildirdi ki, Rusiya, İran, Azərbaycan xarici işlər nazirlərinin görüşünü müzakirə etməyib. Əsasən regional problemlər müzakirə edilib. Bakıya səfərdən sonra Q.Karasin Dağlıq Qarabağ məsələsinin xüsusi müzakirə olunduğunu bildirdi”.

M.Əhmədoğlusözlərinə əlavə etdi ki, bunun ardınca Ermənistan prezidenti S.Sərkisyanın Rusiya prezidenti V.Putinlə Moskvada martın 10-da sərgi açılışında birgə iştirak edəcəkləri barədə məlumat yayıldı:

“Başqa sözlə, S.Sərkisyan Moskvaya çağırılıb. Bu istiqamətdə proseslər isə davam edir”.

Daha sonra politoloq prezident Həsən Ruhaninin İranın region dövlətlərin ərazi bütövlüyünü dəstəklədiklərini bəyan etdiyini bildirdi.

“Prezident Həsən Ruhani İranın region dövlətlərinin ərazi bütövlüyünü dəstəklədiklərini bəyan etdi. Bunun ardınca İran tərəfi İran sərhəd qoşunları komandanı Qasım Rzayinin Azərbaycana 3 günlük (8-10 mart) səfərə gəlməsi və İran, Rusiya, Azərbaycan sərhədçilərinin rəhbərlərinin Bakıda görüşəcəyi ilə bağlı məlumat yaydı”.

Son olaraq M.Əhmədoğlu sözlərinə əlavə etdi ki, hər halda Dağlıq Qarabağ münaqişəsinin praktiki tənzimlənmə mexanizminin işə düşdüyündən danışmaq mümkündür.

1news.az