İtaliyanın sabiq XİN rəhbəri TAP boru kəmərinin həyata keçirilməsinin vacibliyini qeyd edib
“Trans-Adriatik (TAP) boru kəməri layihəsinin həyata keçirilməsi əhəmiyyətlidir”.
1news.az-ın verdiyi xəbərə görə, bu haqda jurnalistlərə İtaliyanın sabiq XİN rəhbəri Franko Fratini Bakıda Diasporla İş üzrə Dövlət Komitəsinin dəstəyilə, Nizami Gəncəvi Beynəlxalq Mərkəzinin təşkilatçılığı ilə IV Qlobal Bakı Forumu çərçivəsində bildirib.
O, İtaliyanın boru kəmərinin tikilişi üçün bütün öhdəlikləri həyata keçirəcəyinin əminliyini bildirib.
Onun sözlərinə görə, layihə Türkiyə vasitəsilə Azərbaycanı Albaniya, Yunanıstan və İtaliya ilə birləşdirəcək:
“Bu layihənin həyata keçirilməsi Azərbaycanın enerji sahəsində vacib rol oynadığını əyani olaraq göstərir”.
Həmçinin o, layihənin tezliklə həyata keçirilməsini də bildirib.
Trans-Adriatik qaz kəməri – Xəzər dənizi hövzəsindən Şərqi Avropaya təbii qaz tədarükünün həyata keçirilməsi üçün boru kəməri layihəsidir.
TAP layhəsini İsveçrənin “Trans Adriatic Pipeline AG” şirkəti həyata keçirir. Bu şirkətinin səhmdarları bunlardır: BP (20%), SOCAR (20%), İtaliyanın “Snam” (20%), Belçikanın “Fluxys” (19%), İspaniyanın “Enagas” (16%) və İsveçrənin “Axpo” (5%).
Qeyd edək ki, Forum Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə İnterAaction Council, Madrid Klubu, İsgəndəriyyə Kitabxanası, Roma Klubu, Dünya Elmlər və Mədəniyyət Akademiyası ilə əməkdaşlıq çərçivəsində təşkil olunub.
Forumda 53 ölkədən 300-dən çox nümayəndə iştirak edir. İki gün davam edəcək Forumda münaqişələrin qarşısının alınmasında dinlərarası dialoqun rolu, miqrasiya, multikulturalizm və inteqrasiya məsələləri, o cümlədən qlobal təhlükəsizliyin təmin olunmasında radikallaşma və miqrasiya amillərinin rolu kimi mühüm məsələlər müzakirə olunacaq.
1news.az
