Nazirlik 450 nəfərdən çox şəxsi peşə hazırlığı və əlavə təhsil kurslarına cəlb edib
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti bu ilin yanvar-fevral aylarında peşələr üzrə peşə hazırlığı və əlavə təhsil kursları təşkil olunub.
1news.az -a nazirliyin İctimaiyyətlə əlaqələr şöbəsindən verilən məlumata görə, Xidmət tərəfindən respublikanın rayon və şəhərlərində dərzi, kompyuter istifadəçisi, kompyuterçi-dizayner, elektrik montyoru, qazanxana maşinisti, avtomobil təmiri üzrə çilingər, əməliyyatçı mühasib, vizajist, bərbər və s. kurslara hazırlıq təşkil olunub.
peşə və ixtisası olmadığına görə münasib iş yeri seçməkdə çətinlik çəkən, yaxud peşə vərdişlərinə uyğun gələn iş olmadığı üçün öz peşəsini dəyişməsi zəruri olan 451 nəfər həmin kurslara cəlb edilib. Onlardan 70,2 faizi gənclərdən ibarət olub.
Peşə hazırlığı və əlavə təhsil kurslarına cəlb olunanların kursları bitirdikdən sonra yeni yiyələndikləri peşələr üzrə məşğulluqlarının təminatı istiqamətində də tədbirlər həyata keçiriləcək.
Bundan başqa, yanvar-fevral aylarında əsasən orta ümumtəhsil məktəblərinin yuxarı sinif şagirdlərindən ibarət olan 25 145 nəfər gəncə gələcəkdə düzgün peşə seçiminə köməklik məqsədilə peşəyönümü məsləhətləri verilib.
1news.az
