Müdafiə Nazirliyi: “Azərbaycan hərbi qüvvələri haqqında Rusiya mətbuatında verilən məlumatlar köhnədir”
Azərbaycan Müdafiə Nazirliyi Rusiyanın “Hərbi-sənaye kuryeri” saytında Aleksandr Xramçixinin “Bir müharibənin ordusu” adlı məqaləsində Azərbaycan Hərbi Qüvvələri haqqında verilən məlumatlara münasibət bildirib.
“Məqaləni oxuyarkən belə təəssürat yaranır ki, müəllif Azərbaycan Silahlı Qüvvələrində baş verən proseslərdən xəbərsizdir”,- deyə, 1news.az-a AR Müdafiə Nazirliyindən bildirildi.
“Azərbaycan qısa zaman ərzində arsenalını müasir, yüksək dəqiqliyə və dağıdıcı qüvvəyə malik silah və texnika ilə yeniləyib. Bu proses artan istiqamətdsə davam edir.
Hərbi qurumdan bildirilib ki, müəllifin fikirləri çox hallarda reallığa uyğun deyil, hazırkı vəziyyəti və regionda baş verən prosesləri əks etdirmir.
Azərbaycan işğalçı, cinayətkar separatçı rejimlə mübarizə üçün kifayət qədər hərbi qüvvəyə malikdir. Azərbaycanın aktiv hərbi əməliyyatlara başlamamasının yeganə səbəbi AR-in sülhsevər siyasəti və beynəlxalq hüquq normalarına hörmətlə yanaşmasıdır. Əksinə Azərbaycanda olan silah və texnika nəinki işğal altında olan Dağlıq Qarabağ ərazisinin, həm də Ermənistan ərazidindəki istənilən obyekti məhv etməyə imkan verir”,- Müdafiə Nazirliyindən bildirilib.
Qeyd edək ki, A. Xramçinko məqalədə Azərbaycan Hərbi Qüvvələri, qoşunların yerdəyişməsi, Rusiya, Ukrayna, Belorusiya, İsrail, Türkiyə, CAR-dan kütləvi hərbi texnika alması haqqında məlumat verir.
Müəllif qeyd edib ki, alınan texnika ( Т-90 tankı, “Msta” SAU, “Smerç”, TOS-1A) Qarabağda erməni müdafiəsini qırmaq üçün nəzərdə tutulub.
1news.az
