Parlament nümayəndələri əfv sərəncamına görə ölkə prezidentinə minnətdarlıqlarını bildirdilər
Mart ayının 18-də keçirilən parlament iclasında millət vəkilləri əfv sərəncamının imzalanmasına görə Azərbaycan Prezidenti İlham Əliyevə minnətdarlıqlarını bildiriblər.
1news.az xəbər verir ki, iclasda çıxış edən spiker Oqtay Əsədov 17 mart Novruz bayramı ərəfəsində 148 nəfərin azadlığa buraxılması haqqında imzaladığı əfv sərəncamına görə prezident İlham Əliyevə minnətdarlığını bildirib.
Spikerin söylədikləri deputatlar tərəfindən alqışlanıb.
Xatırladaq ki, 17 mart tarixində Azərbaycan Respublikası Prezidenti 148 nəfərin əfv olunması haqqında sərəncam imzalayıb. Əfv olunanların 137 nəfəri azadlıqdan məhrumetmə cəzasının qalan hissəsindən, 6 nəfər islah işlərindən, 5 nəfər isə cərimələrin ödənməsindən azad edilib.
Bu siyahıda olan 16 nəfər xarici ölkə vətəndaşıdır və azad olunan kimi ölkədən deportasiya olunub.
Əfvlə bağlı aktın qəbulu zamanı cinayətin ağırlığı, məhkumların cəmiyyət üçün nə dərəcədə təhlükəli olması, səhhəti və ailə vəziyyəti, cəzaçəkmə müəssisələrindəki davranışları nəzərə alınıb.
Əfv olunanlar sırasındakı 14 nəfərin azad olunması ilə bağlı hüquq-müdafiə təşkilatları vəsatət qaldırmışdı. Bura Akif Muradverdiyev, NİDA hərəkatının üzvləri :Rəşadət Axundov, Məmməd Əzizov, Rəşad Həsənov, Ömər Məmmədov, QHT funksionerləri: Rəsul Cəfərov, Anar Məmmədli, Taleh Xasməmmədov, jurnalistlər: Pərviz Həşimov, Hilal Məmmədov, siyasi partiya üzvləri: Sirac Kərimli, Nemət Pənahlı, Yadigar Sadiqov və Tofiq Yaqubov daxildir.
1news.az
