Avropa İttifaqı Azərbaycanda 148 məhkumun əfv olunmasını alqışlayır

Avropa İttifaqının (Aİ) Xarici işlər və siyasi təhlükəsizlik üzrə ali nümayəndəsi Federiko Moqerini Prezident İlham Əliyevin Azərbaycanda 148 məhkumun əfv olunması ilə bağlı sərəncamını alqışlayır.

1news.az-ın verdiyi xəbərə görə, bu haqda Moqerinin təşkilat tərəfindən sayta qoyulmuş bəyanatında qeyd olunub.

“Bu, müsbət addımdır. Bu addım Azərbaycana fevralın 29-da səfərim zamanı günün əsas mövzusu idi”, - deyən Moqerini qeyd edib ki, əfv olunanlar arasında jurnalistlər, vətəndaş cəmiyyəti fəalları və hüquq müdafiəçiləri də var.

“Müstəqil və müxtəlif vətəndaş cəmiyyətləri ölkənin möhkəmlənməsi və sabitliyi üçün qoyulmuş sərmayədir. Ümid edirəm ki, Azərbaycan bundan sonra da BMT, Avropa İttifaqı və ATƏT-in üzvü kimi beynəlxalq öhdəliklər çərçivəsində fəaliyyətini davan etdirəcək”, - o, bildirib.

Xatırladaq ki, Azərbaycan Pespublikasının Prezidenti İlham Əliyev 17 mart 2016-cı ildə 148 məhkumun əfv edilməsilə bağlı sərəncam imzalayıb.  Əfv olunan şəxslərdən 137 nəfəri cəzasının çəkilməmiş hissəsindən, 6 nəfəri islah işləri, 5 nəfəri isə cərimələrin ödənilməsindən azad ediliblər.

Bundan əlavə, əfv olunanlara daxil olan 14 nəfərin ərizəsi insan hüquqları təşkilatları tərəfindən irəli sürülüb. Həmçinin əfv olunan şəxslərdən 16 nəfəri xarici vətəndaşlardır və onlar ölkədən deportasiya olunub.

Əfv haqqında qərar qəbul edilərkən məhkumların şəxsiyyəti, səhhəti, ailə vəziyyəti və cəza çəkdikləri müddətdə davranışları da nəzərə alınıb.

Sərəncam imzalandığı gündən qüvvəyə minir.

Tam siyahı ilə bu linkdən tanış olmaq olar.

1news.az