Azərbaycan Texniki Universitetində beynəlxalq layihəyə start verilib
Azərbaycan Texniki Universitetinin (AzTU) ESTIEM LG Baku “Europe3D Azerbaijan” layihəsi çərçivəsində Avropanın müxtəlif ölkələrindən 25 tələbə Bakıya gəlib.
Universitetdən AZƏRTAC-a bildiriblər ki, martın 20-dən 27-dək reallaşdırılacaq layihədə Azərbaycanın iqtisadi, siyasi və mədəni təqdimatı keçiriləcək. Təlimlərdə iştirak edəcək xarici tələbələr tariximiz, iqtisadiyyatımız və mədəniyyətimiz ilə yaxından tanış olacaqlar.
AzTU-nun nəzdində fəaliyyət göstərən “ESTIEM LG Baku”nun təşkilatçılığı ilə reallaşacaq forumda əsasən mühəndislik və menecment ixtisasları üzrə təhsil alan tələbələr iştirak edəcəklər. Forum çərçivəsində iştirakçı tələbələrin Azərbaycanın tanınmış ictimai-siyasi xadimləri, elm adamları ilə görüşləri və bəzi məkanlara ekuskursiyalar da nəzərdə tutulub.
