Hikmət Hacıyev: “Somalidə həlak olan Azərbaycan vətəndaşının kimliyinin müəyyən edilməsi üçün addımlar atılır”
Somalinin paytaxtı Moqadişoda həlak olan Azərbaycan vətəndaşının kimliyinin müəyyən edilməsi üçün addımlar atılır.
1news.az xəbər verir ki, bunu Xarici İşlər Nazirliyinin mətbuat xidmətinin rəhbəri Hikmət Hacıyev Türkiyə Xarici İşlər Nazirliyi tərəfindən Somalinin paytaxtı Moqadişoda 30 mart tarixində içərisində Türkiyə və Azərbaycan vətəndaşlarının da olduğu nəqliyyat vasitəsinə silahlı hücum edildiyi və hücum nəticəsində həlak olanlar arasında bir nəfər Azərbaycan vətəndaşının olduğu barəsində məlumatını şərh edərkən deyib.
“Azərbaycan Respublikasının Ankaradakı Səfirliyi həlak olan Azərbaycan vətəndaşının kimliyinin müəyyən edilməsi və digər zəruri tədbirlərin görülməsi üçün Türkiyənin Xarici İşlər Nazirliyi və digər aidiyyəti dövlət təşkilatları ilə təmasdadır.
Biz də həlak olanların ailələrinə dərin hüznlə baş sağlığı veririk”- deyə, H.Hacıyev qeyd edib.
1news.az
