Respublika Günü ilə bağlı İlham Əliyevə təbriklər gəlməkdə davam edir
Özbəkistan Respublikasının Prezidenti İslam Kərimov 28 May – Respublika Günü münasibətilə Prezident İlham Əliyevə təbrik məktubu göndərib.
1news.az-ın dövlət başçısının rəsmi saytına istinadən verdiyi xəbərə görə, məktubda deyilir:
“Hörmətli İlham Heydər oğlu.
Azərbaycanın milli bayramı – Respublika Günü münasibətilə səmimi təbriklərimi və xoş arzularımı qəbul edin.
Sizin rəhbərliyinizlə həyata keçirilən, Azərbaycanın geniş potensialından istifadə olunmasına, xalqın rifahının yüksəldilməsinə və ölkənizin nüfuzunun beynəlxalq aləmdə möhkəmlənməsinə yönəlmiş islahatlar və dəyişikliklər siyasətini Özbəkistanda böyük diqqətlə izləyirlər.
Əminəm ki, Özbəkistan ilə Azərbaycan arasında möhkəm və sarsılmaz qarşılıqlı anlaşma, etimad və hörmət prinsiplərinə əsaslanan ənənəvi dostluq münasibətləri ölkələrimizin və xalqlarımızın mənafeyi və rifahı naminə bundan sonra da durmadan inkişaf edəcək.
Hörmətli İlham Heydər oğlu, bu xoş fürsətdən istifadə edərək Sizə möhkəm cansağlığı, bütün işlərinizdə uğurlar arzulayır, qardaş Azərbaycan xalqına sülh və daha yüksək firavanlıq diləyirəm”.
Bundan başqa, Finlandiya Respublikasının prezidenti Sauli Niinistö, İordaniyanın kralı II Abdullah, Qətər Dövlətinin əmiri Şeyx Təmim bin Həməd Al Tani, Qətər Dövlətinin baş naziri və daxili işlər naziri Abdullah bin Nasser bin Xəlifə Al Tani, Qətər Dövləti əmirinin müavini Abdullah bin Həməd Al Tani də Azərbaycanın dövlət başçısına məktub göndərərək Respublika günü münasibətilə xalqımızı təbrik ediblər.
1news.az
