Həvəskarlar arasında velosiped yarışı keçiriləcək
Azərbaycan Velosiped İdmanı Federasiyası və "Sportsman" jurnalının birgə təşkilatçılığı ilə may ayının 28-i, saat 18:00-da Dənizkənarı Bulvarda həvəskarların velosiped yarışı keçiriləcək.
1news.az-ın məlumatına görə, 28 May Respublika Günü və Formula-1 yarışlarına dəstək məqsədilə təşkil olunacaq yarışın sonunda Azərbaycanın estrada ulduzlarının iştirakı ilə konsert proqramı da təşkil olunacaq.
Arzu edən həvəskar velosipedçilər bu yarışda iştirak edib hədiyyə qazana bilər.
Kişilərin və qadınların yarışı ayrı keçiriləcək.
Yarışın start və finişi olaraq Bakı İdman Sarayının arxası (velosiped kirayəsi məntəqəsinin yanı) müəyyən edilib.
Marşrut isə Bakı İdman Sarayından Dövlət Bayrağı Meydanına və əksinə olacaq.
Qeyd edək ki, iştirakçılar velosipedlərini özləri ilə gətirməlidirlər.
1news.az
