Təşkilatçılar: Bakıda keçiriləcək «Formula-1» yarışına Rusiyadan 3 mindən çox azarkeş gələcək

Bakıda keçiriləcək “Formula-1” üzrə dünya çempionatının səkkizinci Avropa Qran-pri yarışlarına baxmaq üçün Rusiyadan 3 mindən çox azarkeşin gələcəyi gözlənilir.

1news.az xəbər verir ki, bu barədə Rusiyanın “RİA Novosti” informasiya agentliyinə yarışın təşkilatçıları məlumat veriblər.

“Yarışın keçiriləcəyi günlər təkcə Rusiyadan Bakıya 3 mindən artıq azarkeş gələcək. Onların bəziləri artıq qalacaqları otellərdə yerləşiblər. Ümumilikdə, yay fəslində Bakıya Rusiyadan çoxlu turistin gələcəyini gözləyirik. Onlar üçün lazım olan bütün şərait yaradılıb”- deyə, məlumatda qeyd olunub.

Nəzərinizə çatdıraq ki, Azərbaycan “Formula-1” yarışına ilk dəfə ev sahibliyi edəcək. Bu il səkkizinci dəfə keçiriləcək mərhələnin adı Avropa Qran-prisi adlanır. 10 komandanın birincilik uğrunda mübarizə aparacağı yarış trekinin uzunluğu 6 kilometrdir. Trekin ən geniş yerinin eni 13, ən dar hissəsinin eni isə İçərişəhər ətrafında, o cümlədən 7-ci və 8-ci döngələrdə 7,6 metr təşkil edəcək.

Yarışın start və finiş xətti Azadlıq meydanında olacaq. Burada, həmçinin “Paddok klub”, komandaların boksları və pit-leyn qurulub.

Qran-prinin birinci günündə “Formula-1” və GP2 seriyası üzrə sərbəst yürüşlər təşkil olunacaq. İyunun 18-də “Formula-1” üzrə sərbəst və sıralama yürüşü, GP2 üzrə isə birinci yarış keçiriləcək. Nəhayət, sonuncu gün – iyunun 19-da Avropa Qran-pri yarışları, həmçinin GP2 üzrə ikinci yürüş baş tutacaq.

1news.az