MFL Kubokunun Fransada keçirilən Avropa Çempionatına gedəcək qalib komandası məlum oldu – FOTO

Bazar günü, iyunun 19-da Bakı Olimpiya Stadionunda yerləşən “Sportster” idman kompleksində MFL yay Kubokunun final oyunu keçirilib.

1news.az-ın məlumatına görə, finalda bütün ay boyunca turnirin ən güclü komandaları – “Qaradağ Lökbatan” və “Napoli” qarşılaşıblar.

Komandalar hər iki hissədə kəskin hücumlar edərək baxımlı və gərgin futbol  nümayiş etdiriblər. Rəqiblər elə birinci hissədəcə qapılara top vurmaq imkanlarına malik olsalar da, qapıçılar və hər iki komandanın müdafiəçiləri rəqibin hücumunu müvəffəqiyyətlə dəf ediblər.

Komandalar fasiləyə qolsuz bərabərliklə çıxdılar. Lakin aydın idi ki, hər iki komanda bu hesabla razılaşmayacaq. Heç-heçəyə və oyundan sonrakı penalti zərbələrinə hətta finalçıların azarkeşləri də razı deyildilər. Onlar meydanı dövrəyə alaraq komandalarını irəli səsləyirdilər.

Qarşılıqlı hücumların birində “Qaradağ Lökbatan” komandasının oyunçusu Nicat Baxşıyev uzaq küncü dəqiq nişan alaraq gözəl qolla fərqləndi. Qapısında qol görən “Neapol” təşəbbüsü ələ alaraq bütün qüvvəsi ilə irəli atıldı. Elə təəssürat yaranmışdı ki, “Neapol” tezliklə hesabı bərabərləşdirəcək, lakin hər dəfə son zərbədə dəqiqlik çatışmırdı. “Qaradağ” rəqibə cavab verməyə çalışsa da, son dəqiqələrdə üstünlük daha çox “Neapol” komandasında idi. Bununla belə, onlar “Qaradağ”ın qapısına yol tapa bilmədilər.

Beləliklə, turnirdə iştirak edən 24 komanda arasında MFL-in yay Kubokunun qalibi “Qaradağ Lökbatan” komandası oldu. Çempionatın bombardiri də çempion komandanın üzvü, rəqib qapılarına 21 top vuran Nicat Baxşıyev oldu.

Qeyd edək ki, “Qaradağ Lökbatan” turnirin ən məhsuldar komandası adını da qazandı. Onun hesabında 60 vurulmuş və10 buraxılmış top var. Bundan başqa komanda bütün turnir ərzində bir dəfə də olsun məğlub olmadı.

Həmçinin qeyd edək ki, 3-cü yerin qalibi “Galaxy Travel” komandası oldu (3-cü yer uğrunda matç keçirilmədi, rəqibə texniki məğlubiyyət verildi).

Final görüşünün yekunu olaraq mükafatlandırma mərasimi təşkil edildi.

Bürünc medalın qaliblərinə mükafatı MFL-in həmtəsisçisi Rəhman Hacıyev təqdim etdi. “Napoli” komandasına gümüş medalı turnirin təşkilati dəstəyini həyata keçirən SMG şirkətinin direktoru Ayaz Əhmədov təqdim etdi.

Qalib “Qaradağ Lökbatan” komandasına qızıl medalları, kubok və əsas mükafatı – Fransada keçirilən Avropa Çempionatının yarımfinal oyununa biletləri Azərbaycan yığmasının sabiq oyunçusu, hazırda məşqçi olan Mahmud Qurbanov təqdim etdi.

Fotoda: Mahmud Qurbanov qalibləri - “Qaradağ Lökbatan” komandasını təltif edir

Fotoda: 2-ci yerin sahibləri – “Napoli” komandası

Fotoda: Turnirin qalibi – “Qaradağ Lökbatan” komandası

Arayış:

MFL (Mini Futbol Liqası) – kütləvi futbolun yeni formatıdır. MFL çərçivəsində həvəskarlar arasında bu ilin payızında başlayacaq və gələn ilin yayınadək davam edəcək çempionat təşkil ediləcək.  

MFL-in yay Kuboku qeyd etdiyimiz böyük turnirqabağı sınaq yarışı idi.

Daha əvvəl məlum olmuşdu ki, bu yay ərzində MFL yeni mini-turnir keçirəcək və turnirin qalib komandası San-Marinoda Azərbaycan yığmasının 2018-ci il Dünya Çempionatının seçmə mərhələsi çərçivəsində keçiriləcək oyununa getmək imkanı əldə edəcək.

Mövzu ilə əlaqədar oxuyun:

Həvəskar futbol turnirinə start verilir, qaliblər Avropa Çempionatının oyununa gedəcək

* * *

“Sporster” şirkətinin meydanları müasir texnologiyalar əsasında tikilib. Dünya standartlarına tam cavab verən meydanlar hər kəsin üzünə açıqdır.

Daha ətraflı məlumat almaq, qiymətlərlə tanış olmaq və Sizə uyğun olan vaxtda meydanları icarəyə götürmək üçün aşağıdakı nömrələrlə əlaqə saxlaya bilərsiniz:

(050) 555-44-40

(050) 210-65-03

1news.az