ATƏT-də daimi nümayəndəlik: Azərbaycanın ərazi bütövlüyü danışıqlar mövzusu və ya kompromis elementi ola bilməz
“ATƏT-in digər ölkələri kimi, Azərbaycanın ərazi bütövlüyü danışıqlar mövzusu və ya kompromis elementi ola bilməz və olmayacaq”.
Bu barədə Azərbaycanın ATƏT yanında Daimi Nümayəndəliyinin iyunun 30-da Vyanada keçirilən konfransında ATƏT-in təhlükəsizlik məsələləri ilə bağlı 2016-cı il üçün icmal bəyanatında deyilir.
“Bizim heç bir üzv dövlətə qarşı ərazi iddiamız yoxdur, biz BMT Nizamnaməsi, Helsinki Yekun Aktı və BMT Təhlükəsizlik Şurasının 4 müvafiq qətnamələri əsasında qanuni olaraq bizə məxsus olanı tələb edirik”, - bu, “ATƏT məkanında münaqişə vəziyyətləri” mövzusundakı işçi sessiyası çərçivəsində bildirilib.
“Beynəlxalq hüququn norma və prinsiplərinə uyğun olmayan qərarlar ədalətli və stabil ola bilməz. Beləliklə, beynəlxalq norma və prinsipləri pozulması nəticəsində yaranmış vəziyyət nizamlanmanın həlli ola bilməz”, - Azərbaycanın ATƏT yanında Daimi Nümayəndəliyin saytında qeyd olunub.
Mətndə qeyd olunur ki, Azərbaycan təcavüzün qurbanı olaraq münaqişənin tez bir zamanda həllində ən çox maraqlı olan tərəfdir. Azərbaycanın ATƏT-in Minsk qrupu çərçivəsində aparılan danışıqlarda iştirakımız münaqişənin sülh yolu ilə həllinə sadiqliyimizi göstərən aydın işarədir.
Eyni zamanda, Azərbaycan uzunmüddətli həllə gətirib çıxaracaq effektiv prosesin, münaqişənin qurbanı olmuş milyonlarla insanların əzablarını yüngülləşdirməyin tərəfdarıdır:
“Azərbaycan bu günün prinsiplərini nəzərə alaraq münaqişənin mərhələli həllində maneələrin aradan qaldırılmasına yönəlmiş danışıqlara hazırdır”.
Həmçinin Azərbaycan nümayəndə heyəti Azərbaycan və Ermənistan prezidentlərinin mayın 16-da Vyanada, eləcə də iyunun 20-də Sankt-Peterburqda keçirilmiş görüşlər zamanı əldə olunmuş nailiyyətləri alqışlayır.
Eyni zamanda qeyd olunur ki, danışıqların müsbət atmosferdə keçməsini alqışlayaraq münaqişənin sülh yolu ilə həllinə nail olmaq üçün substantiv danışıqların təxirə salınmadan yenilənməsi vacib əhəmiyyət kəsb edir.
Bütün sadalananları nəzərə alaraq Azərbaycan nümayəndə heyəti ATƏT-in bütün tərəfdarlarını, fəaliyyətdə olan nümayəndə və Minsk qrupunun iştirakçısı kimi Almaniya da daxil olmaqla Ermənistanı effektli danışıqlara cəlb etmək üçün lazımi tədbirlər görməyə çağırır.
1news.az
