“Qəbələ” Avroliqanın pley-offunda! - FOTO - VIDEO
UEFA Avropa Liqasında III təsnifat mərhələsinə yekun vurulub.
1news.az xəbər verir ki, təmsilçimiz “Qəbələ” Fransanın “Lill” klubu ilə cavab oyununa çıxıb.
Matça fəal başlayan təmsilçimiz hesabı açan tərəf olub. 34-cü dəqiqədə xorvatiyalı legioner Filip Ozobiç uzaqdan möhtəşəm zərbə ilə komandasını önə keçirib.
Rəqib komanda son anlarda fəallaşsa da, onlara bərabərlik qolunu vurmaq nəsib olmayıb. Bununla da qələbə qazanan “Qəbələ”nin sayəsində ardıcıl üçüncü il mötəbər yarışın pley-off mərhələsində iki komanda ilə təmsil olunacağıq.
Çempionlar Liqasında uduzub, mübarizəni Avropa Liqasında davam etdirən “Qarabağ”a qoşulan “Qəbələ” ötənilki uğuruna yaxınlaşıb. Həmin vaxt 4 mərhələ adlayıb, qrupa vəsiqə qazanan əyalət təmsilçisi təsnifat oyunlarında ardıcıl 6 ev matçında uduzmayıb. Bu müddətdə bir heç-heçə əldə edən təmsilçimiz 5 qələbə qazanıb.
Avropa Liqası, III təsnifat mərhələsi
“Qəbələ” (Azərbaycan) - “Lill” (Fransa) - 1:0
Qol: Filip Ozobiç, 34
1news.az
