İsveçrə və Azərbaycanın tanınmış musiqiçiləri “Bakı-St.Morits gecəsi” adlı konsertdə çıxış edəcək - FOTO

CBC Sport Arena Polo üzrə Dünya Kuboku yarışları çərçivəsində İsveçrənin əfsanəvi Badrutts Palace St.Moritz otelinin dəstəyi ilə sentyabrın 10-u saat 20:30-da Elite Events Hall konsert zalında təntənəli konsert təşkil olunacaq.

Gecədə İsveçrə və Azərbaycanın tanınmış musiqiçiləri çıxış edəcək. Respublikanın xalq artisti Ənvər Sadıqov, Montre caz festivalının qalibi Emil Əfrasiyab, dünyaca məşhur Natiq Ritm Qrupu, xanəndə Ehtiram Hüseynov, Azərbaycanın Eurovision təmsilçisi Dilarə Kazımova, əməkdar artist Akif Süleymanbəylinin rəhbərliyi ilə estrada orkestri, Opera və Balet teatrının solisti Çinarə Şirin, İsveçrənin xalq musiqi ifaçıları və tanınmış DJ Ray Douglas  - meqa-istedadlı musiqiçilər iki fərqli mədəniyyətin simbiozunu bir gecədə, “Baku-Morits Polo Night” səhnəsində eksklüziv olaraq gecənin qonaqları üçün canlandıracaq.

Qonaqlar həmçinin İsveçrə və Azərbaycan mətbəxinin nəfis təamlarını dadmaq imkanı əldə edəcək. İsveçrə milli mətbəx nümunələri Badrutts Palace otelindən məxsusi olaraq bu konsert üçün Elite Events Hall-a gətiriləcək. Azərbacyan milli mətbəxinin ləzzətlərini isə yeni və nəfis dizayna malik Elite Events Hall-un peşəkar aşpaz komandası hazırlayacaq.

Təntənəli ab-hava, sürpriz və hədiyyələrlə dolu gecədə qonaqlar eyni zamanda Sankt Morits şəhərində keçiriləcək 33-cü Qarüstü Polo üzrə Dünya Çempionatına VİP dəvətnamə qazanmaq imkanı əldə edəcəklər ki, bura həm yol, həm də əfsanəvi Badrutts Palace otelində qonaqlama xərcləri daxildir. 33-cü Qarüstü Polo üzrə Dünya Çempionatı hər ilin yanvar ayında keçirilir və Avropanın idman və kübar həyatında ən önəmli hadisələrdən sayılır.

Konsertə bilet əldə etmək üçün (+99451) 664-52-51 nömrəli telefonla əlaqə saxlaya bilərsiniz.