“Barselona”dan Messiyə müddətsiz müqavilə təklifi

“Barselona” ulduz futbolçusu Lionel Messiyə yeni müqavilə təklif etməyə hazırlaşır.

1news.az-ın Türkiyə mətbuatına istinadən yaydığı xəbərə görə, bu barədə klub prezidenti Xosep Mariya Bartomeu məlumat verib.

Klub rəhbəri argentinalı hücumçuya ömürlük müqavilə təklif edəcəklərini deyib:

“Messi bizim üçün çox önəmli futbolçudu. Qarşıdakı aylarda onunla görüşümüz olacaq və müddət qoymadan yeni müqavilə təklif edəcəyik. Messinin hələ 29 yaşı var. Çox istedadlı, istəkli və uzun illər mükəmməl futbol oynayacaq səviyyədədi. Ona limit qoya bilmərik. “Barselona”da qalacağını düşünürəm”.

Qeyd edək ki, Messinin “Barselona” ilə hazırkı müqaviləsi 2018-ci ilə qədərdir.

1news.az