Yavər Camalov: Müəssisələrimiz dünya və NATO standartlarına cavab verən məhsullar istehsal etmək qabiliyyətindədirlər

Bu gün Bakıda II Azərbaycan Beynəlxalq Müdafiə Sərgisi “ADEX-2016”nın rəsmi açılış mərasimi keçirilib.

1news.az-ın məlumatına görə, açılış mərasimində müdafiə sənayesi naziri Yavər Camalov, prezidentin hərbi məsələlər üzrə müşaviri Vahid Əliyev, müdafiə naziri, general-polkovnik Zakir Həsənov, Dövlət Sərhəd Xidmətinin rəisi, general-polkovnik Elçin Quliyev, baş nazirin müavini Yaqub Eyyubov, Türkiyənin müdafiə naziri Fikri İşıq, digər rəsmi şəxslər, diplomatik korpusun nümayəndələri, hərbi attaşelər və xarici qonaqlar iştirak edib.

Mərasimdə çıxış edən müdafiə sənayesi naziri Yavər Camalov bildirib ki, son illər Azərbaycan ordusunun maddi-texniki bazası gücləndirilib:

“Azərbaycan Silahlı Qüvvələri regionda ən güclü ordulardan biridir. Hərbi-texniki əməkdaşlıq sahəsində uğurlar əldə olunub. “ADEX 2016” sərgisi çərçivəsində əməkdaşlıq imkanlarımızı genişlənəcək”.

O bildirib ki, dost və tərəfdaş ölkələrlə əməkdaşlıq nəticəsində ölkəmizin təhlükəsizliyini təmin etmək üçün hərbi texnika, silah və sursat istehsal edən müəssisələrimiz tamamilə yenidən qurulub:

“Bu gün müəssisələrimiz dünya və NATO standartlarına cavab verə biləcək məhsul istehsal etmək qabiliyyəti əldə edib”.

Nazir qeyd edib ki, hazırda 125 məmulatın yaradılması istiqamətində təcrübə uğurla həyata keçirilir.

1news.az