Səidə Sultanın produserini öldürməkdə təqsirli bilinən şəxsə 18 il HƏBS TƏLƏBİ

Tanınmış müğənni Səidə Sultanın prodüseri Hamlet Cahangirovu qətldə təqsirləndirilən Yusif Mirzəyevin cinayət işi üzrə məhkəmə davam edib.

1news.az lent.az-a istinadən xəbər verir ki, Bakı Ağır Cinayətlər Məhkəməsində hakim Zeynal Ağayevin sədrliyi ilə keçirilən prosesdə sənədlərin tətbiqi mərhələsi keçirilib.

Bundan sonra prosesdə məhkəmə istintaqının başa çatdığı bildirilib. Söz dövlət ittihamçısına verilib. Prokuror çıxışı zamanı Yusif Mirzəyevin 18 il müddətinə azadlıqdan məhrum edilməsini istəyib. Təqsirləndirilən şəxsin vəkili müdafiə çıxışı üçün vaxt istəyib. Proses oktyabrın 4-də davam edəcək.

Qeyd edək ki,  qətl keçən il Yasamal rayonu Zahid Xəlilov küçəsində baş verib. Hamlet Cahangirov mənzilində  bıçaqlanaraq öldürülüb.Hüquq mühafizə orqanlarının apardığı əməliyyat-axtarış nəticəsində H. Cahangirovu qətlə yetirməkdə şübhəli bilinən Yusif Mirzəyev saxlanılıb.

Öldürülən Hamlet Cahangirov bir vaxtlar Səidə Sultanın prodüseri çalışıb.

1news.az