Ronaldinyo: “Azərbaycan klubunda oynamaq? Niyə də yox?”
Bakı Olimpiya Stadionunda ölkəmizdə səfərdə olan əfsanəvi futbolçu Ronaldinyonun iştirakı ilə mətbuat konfransı keçirilib.
1news.az-ın məlumatına görə, Bakıda Ronaldinyo Futbol Akademiyasının (Ronaldinho Soccer Academy) açılışı münasibətilə baş tutan tədbirdə “Qəbələ” klubunun prezidenti Tale Heydərov, AFFA-nın baş katibi Elxan Məmmədov, “Qəbələ” Futbol Akademiyasının direktor müavini Nail Kərimov, AFFA-nın əməkdaşı Riad Rəfiyev də iştirak ediblər.
Qeyd edək ki, sözügedən akademiya dünyada sayca üçüncü olacaq. Belə ki, hazırda Braziliyanın Qremio və Birləşmiş Ərəb Əmirliklərinin Dubay şəhərlərində oxşar akademiyalar fəaliyyət göstərir.
Bakıda açılacaq akademiyada 6 yaşdan yuxarı uşaqlar pullu və pulsuz olaraq məşqlər edəcəklər. Bundan əlavə akademiyada müxtəlif sosial layihələrin keçirilməsi nəzərdə tutulub.
Tədbir iştirakçılarını salamlayan Ronaldinyo əvvəllər də Azərbaycan haqda çoxlu yaxşı sözlər eşitdiyini bildirməklə yanaşı Bakıda olmaqdan şad olduğunu deyib.
Akademiya ilə bağlı məlumat verən əfsanəvi futbolçu təxminən bir ay yarım əvvəldən “Qəbələ” futbol klubu ilə bu barədə danışıqlara başladığını deyib və bildirib ki, əsas məqsədi akademiyaya gələn uşaqların gələcəkdə peşəkar oyunçu olmalarına dəstək olmaqdır.
Azərbaycan millisinin DÇ-2018-in seçmə mərhələsinə uğurlu start götürməsindən məlumatlı olduğunu deyən Ronaldinyo təklif olacağı təqdirdə gələcəkdə Azərbaycanla Braziliya millisinin yoldaşlıq görüşünün təşkili üçün köməklik göstərməyə hazır olduğunu söyləyib.
Məşhur futbolçu təklif olunarsa Azərbaycan klubunda oynayıb oynamayacağı ilə bağlı sualı da cavablandırıb:
“Düzü, karyeramı bitirib-biitirməməklə bağlı hələ qərar verməmişəm. Dekabr ayına qədər qərar verəcəm. Ola bilsin ki, vida oyunu keçirim. Azərbaycan klubunda oynamaq məsələsinə gəlincə, niyə də yox? Hər şey ola bilər”.
İlk dəfədir ki, Bakıda olduğunu deyən Ronaldinyo mətbəximizi çox sevdiyini deyib:
“Düzünü deyim, dünən axşam gəlmişəm. Aeroportdan çıxandan sonra restoranda yemək yedim. Mətbəxinizi çox sevdim. Şəhəri gəzməyə hələ vaxtım olmayıb. Burdan çıxandan sonra daha yaxından tanıyacam”.
Lionel Messini dünyanın ən yaxşı futbolçusu sayan Ronaldinyo azərbaycanlı futbolçulara bir sıra məsləhətlər də verib:
“Uşaqlar nə qədər tez futbol oynamağa başlasalar, o qədər yaxşı olar. Məşqlərinə ciddi yanaşmalıdırlar. Məşqə hamıdan əvvəl gəlib, hamıdan sonra getmək lazımdı. Yüksək səviyyəyə çatmaq istəyirlərsə, ciddi hazırlaşmalıdırlar”.
1news.az
