ANAMA: Beyləqan rayonunda partlamamış hərbi sursat aşkarlanıb

Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) mütəxəssisləri Beyləqan rayonunun Birinci Şahsevən kəndində dəmiryol stansiyasının yaxınlığında beş top mərmisinin gilizi (boş), iki partlamamış hərbi sursat - 122 millimetrlik (OF-462) və 125 millimetrlik top mərmiləri (OF-26) aşkar edərək götürüblər. Ümumilikdə 1500 kvadratmetr ərazi yoxlanılıb.

1news.az-a ANAMA-nın mətbuat xidmətindən verilən xəbərə görə, aprelin 7-dən noyabrın 15-dək agentlik tərəfindən Zərdab, Tərtər, Ağcabədi, Ağdam, Bərdə, Füzuli, Goranboy, Tovuz, Qazax, Ağstafa, Samux, Göygöl, Şəmkir, Cəlilabad, Ucar, Astara, Salyan rayonlarında, Mingəçevir, Sumqayıt, Gəncə, Lənkəran, Şirvan və Bakı şəhərlərində ümumilikdə 649 ev və həyətyanı sahəyə, 3 hərbi hissəyə, 2 kənd qəbiristanlığına, 5 kənd orta məktəbinə, iki tibb məntəqəsinə, bir metal anbarına, 30 fermaya, əkin sahələrinə, bir şərab zavoduna, bir qoruq ərazisinə, bir çınqıl karxanasına və bir dəmiryolu stansiyasının ərazisinə baxış olub.

Təmizləmə əməliyyatları nəticəsində 3955 partlamamış hərbi sursat, piyada əleyhinə 15, o cümlədən üç “POMZ-2”, iki “OZM-72”, iki “siqnal minası” və tank əleyhinə 43 mina aşkar olunaraq zərərsizləşdirilib.

1news.az