Ərdoğanın dollarla bağlı çağırışı biznesmenləri hərəkətə keçirdi - VİDEO

Türkiyə prezidenti Rəcəb Tayyib Ərdoğanın ölkə vətəndaşlarına dollarla bağlı çağırışından dərhal sonra bəzi iş adamları hərəkətə keçib.

Bingöldə dollarını türk lirəsinə dəyişənlər üçün müxtəlif kampaniyalar başladılıb. Belə ki, dolları milli valyutaya dəyişərək qəbzini təqdim edən vətəndaşlar üçün pulsuz nahar və bir həftə boyunca təmənnasız çörək verməyə başlayıblar.

İş adamı Bahri Kara hər kəsi Ərdoğanın çağırışına dəstək verməyə səsləyib: "Prezidentimiz iqtisadiyyata dəstək üçün çağırış etdi. Biz də iş adamı olaraq bu çağırışa dəstək veririk. Odur ki, 100 dollarını milli valyutaya dəyişərək qəbzini təqdim edənə nahar yeməyi veririk.İqtisadiyyatımızın güclənməsi üçün xalqımızı və iş adamlarını prezidentimizin çağırışına dəstək verməyə dəvət edirəm".

Çörək istehsalı ilə məşğul olan İdris Satılmış isə belə deyib: "Mən bir istehsalçı olaraq dolların yüksəlməsindən narahatam. Ona görə də bütün vətəndaşlarımıza səslənirəm: "100 dollarını dəyişən hər kəsə bir həftə ərzində pulsuz çörək verəcəyik". Dolların düşməsini lirənin isə dəyər qazanmasını istəyirik". 

Xatırladaq ki, Türkiyə prezidenti Rəcəb Tayyib Ərdoğan ölkə vətəndaşlarına dollara nisbətdə milli valyuta məzənnəsinin kəskin düşməsi ilə əlaqədar çağırış edib.

Ərdoğan vətəndaşları evlərdə saxladığı dollarları lirəyə dəyişməyə çağırıb: “Qoy, yastığın altındakı dollarları çıxartsınlar və onları qızıla, lirəyə dəyişsinlər. Türk lirəsi və qızıl dəyər qazansın. Narahat olmayın, biz tezliklə bu oyunu pozacağıq. Eyni ilə bu oyunu 2007-2008-ci ildə reallaşdırmağa çalışırdılar. O vaxt da dedim ki, bu keçəcək. İndi də eyni sözləri deyirəm – keçəcək”.

Xəzər Xəbər