Bakıda dolların "qara bazarından" reportaj - VİDEO

Hazırda ölkəmizdə fəaliyyət göstərən əksər banklar dollar satmır. İnsanlar isə dollara olan tələbatlarını məcburən "qara bazardan" təmin etməli olurlar.

Hətta sosial şəbəkələrdə də dollar satışını təklif edənlər var. Əməkdaşlarımız metronun "28 may" stansiyası yaxınlığındakı "qara bazarda" olublar və ordan reportaj hazırlayıblar.

1news.az "Xəzər Xəbər"ə istindadən xəbər verir ki, dollara olan tələbat nəticəsində "Facebook" sosial şəbəkəsində çoxlu sayda dolların alqı-satqı elanları ortaya çıxıb, hətta "exchange" səhifələri açanlarda olub. Amma məsələ ictimailəşən kimi elanlar yığışdırılıb, səhifələr isə qapadılıb.

Sosial şəbəkələrdən yığışdırılsa da, qara bazarlarda dolların alqı-satıqısı hələ də həyata keçirilir. Banklar dollar satmadığından xarici valyutaya ehtiyacı olanlar belə bazarlara üz tuturlar.

Bu görüntülər paytaxtda metronun "28 may" stansiyasının yaxınlığında - əvvəllər exchangelərin bol olduğu Səməd Vurğun parkının yanında gizli şəkildə lentə alınıb. Üstəlik, banklardan fərqli olaraq belə bazarlarda istənilən qədər xarici valyuta almaq və satmaq mümkündür.

Belə bazarlarda bu gün üçün 1 dolların alışı isə 1 manat 82 qəpikdən həyata keçirilir.

Azərbaycan Banklar Assosiasiyasının prezidenti Zakir Nuriyev "Xəzər Xəbər"ə verdiyi açıqlamada isə bildirilib ki, hazırda qara bazar mövcud olsa da, o, əvvəlki aktivliyini itirib və bu gün üçün bazarlarda passivləşmə müşahidə edilir.

Cəmil Abbasov