Gənclər Quba soyqırımı məzarlığını və Milli Qəhrəman Çingiz Qurbanovun məzarını ziyarət ediblər – FOTO
31 Mart - Azərbaycanlıların Soyqırımı Günü ərəfəsində Quba Soyqırımı Memorial Kompleksini hər gün yüzlərlə soydaşımız ziyarət edir.
Martın 30-da Bakı Şəhər Gənclər və İdman Baş İdarəsinin təşkilatçılığı ilə 50-yə yaxın tələbə və fəal gənc ərazidəki kütləvi məzarlığı və Quba Soyqırımı Memorial Kompleksini ziyarət edərək, ermənilərin törətdikləri soyqırımı haqqında ətraflı məlumatlandırılıblar.
Diqqətə çatdırılıb ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkar edilib. Bundan sonra Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.
Qeyd edilib ki, Quba Soyqırımı Memorial Kompleksi Heydər Əliyev Fondunun dəstəyi ilə yaradılıb və 2013-cü il sentyabrın 18-də açılışı olub.
Komplekslə tanışlıqdan sonra ziyarətçilər xatirə kitabına ürək sözlərini yazıblar.
Sonra gənclər Qusardakı Şəhidlər xiyabanında Azərbaycanın Milli Qəhrəmanı Çingiz Qurbanovun məzarını ziyarət ediblər. Şəhid əsgərin qəbri üstə tər qərənfillər düzülüb, ruhuna dualar oxunub.
AZƏRTAC
