Avropa Liqası: “Beşiktaş”ı üzən qələbə, “Mançester Yunayted” əlavə vaxtda sevindi
Avropa Liqasında 1/4 final mərhələsinin cavab oyunları keçirilib.
1news.az-ın məlumatına görə, dünən axşam baş tutan 4 görüşdən sonra yarımfinalçıların adına aydınlıq gəlib.
Belçikanın “Genk” klubu doğma arenada İspaniya “Selta”sını qəbul edib. İlk səfər oyunuda minimal hesabla məğlub “Genk” rəqibi ilə qollu bərabərliyə qalıb və iki oyunun nəticəsinə görə mübarizəni dayandırmalı olub.
Belçikanın digər təmsilçisi “Anderlext” isə turnirin əsas favoriti “Mançester Yunayted”lə səfər oyununa yollanıb. Bu oyunda da əvvəlki matçda olduğu kimi əsas vaxt 1:1 hesabı ilə başa çatıb. Uzatma dəqiqələrdə daha bir qol vuran “qırmızı şeytanlar” adını yarımfinala yazdırıblar.
Almaniyanın “Şalke” klubu isə cavab oyununu evdə keçirib. Səfərdə keçirdiyi ilk oyunda “Ayaks”a 0:2 hesabı ilə məğlub olan alman klubu revanş götürməyə yaxın olsa da bunu bacarmayıb.
Belə ki, matçın əsas vaxtı meydan sahiblərinin üstünlüyü ilə tamamlanıb - 2:0. Uzatma dəqiqələrində almanlar daha bir qol vursalar da, özündə güc tapan hollandlar iki qol vuraraq görüşün taleyini öz xeyirlərinə həll ediblər.
Türkiyənin Avroliqadakı yeganə təmsilçisi “Beşiktaş” doğma arenada “Lion”la həlledici oyuna çıxıb. Əvvəlki oyunda olduğu kimi bu dəfə də görüşün əsas vaxtı 2:1 hesabı ilə başa çatıb. Belə ki, ilk oyunda fransızlar qalib gəlmişdilərsə, bu dəfə türklər eyni hesabla üstün olub. Buna görə də oyuna əlavə vaxt təyin olunub.
Əlavə vaxtda qapılara qol vurulmayınca qalibi penalti vuruşları bəlli edib. Burada isə “Lion” futbolçuları daha dəqiq oynayaraq (7:6) adlarını yarımfinala yazdırıblar.
UEFA Avropa Liqası
1/4 final mərhələsi, cavab oyunları
20 aprel
“Genk” (Belçika) – “Selta” (İspaniya) - 1:1
Qollar: Trossard, 67 - Sisto, 64
Baş hakim: Villiam Kollum (Şotlandiya)
Genk. “Luminus Arena”
İlk oyun – 2:3
“Mançester Yunayted” (İngiltərə) – “Anderlext” (Belçika) - 2:1
Qollar: Mxitaryan, 10, Reşford, 107 (əlavə vaxtda) - Hanni, 32
Baş hakim: Alberto Undiano Malyenko (İspaniya)
Mançester. “Old Trafford” stadionu
İlk oyun – 1:1
“Şalke” (Almaniya) – “Ayaks” (Hollandiya) - 3:2
Qollar: Qoreçka, 53, Burqstaller, 56, Kaliquri, 101 (əlavə vaxtda) - Virgever, 111 (əlavə vaxtda), Yunus, 120 (əlavə vaxtda)
Baş hakim: Ovidiu Hateqan (Rumıniya)
Gelzenkirhen. “Veltins Arena”
İlk oyun – 0:2
“Beşiktaş” (Türkiyə) – “Lion” (Fransa) - 2:1 ( 6:7 penaltilər)
Qollar: Talişça, 27, 58 - Lakazette, 34
Baş hakim: Milorad Maziç (Serbiya)
İstanbul. “Vodafon Arena”
İlk oyun – 1:2
Babək Cahandarov
