XİN: Azərbaycanlı diplomatın arvadının oğurluq edib-etməməsi araşdırılacaq
Azərbaycanlı diplomatın arvadı Mehriban Cəbrayılova Bronksda yerləşən “Marshalls” mağazasından 188 dollarlıq malı oğurlamaqda ittiham edilir.
1news.az xəbər verir ki, bu barədə “ New York Daily News” qəzeti məlumat yayıb. Məlumata görə, ölkəmizin ABŞ-dakı səfirliyinin birinci katibi Fərid Cəbrayılovun 29 yaşlı həyat yoldaşı bahalı malı uşaq arabasında mağazadan çıxarmaq istəyərkən mühafizəçilər tərəfindən saxlanılıb.
Mehriban Cəbrayılova hadisə yerinə gəlmiş polis əməkdaşlarına bildirib ki, diplomatın həyat yoldaşıdır və diplomatik toxunulmazlığa malikdir. Polis saxlanılan şəxsin statusu müəyyən edildikdən sonra qadını sərbəst buraxıb.
Qəzetin yazdığına görə, Nyu-York polisi qadının toxunulmazlığının ləğvi ilə bağlı Dövlət Departamentinə müraciət edib. Dövlət Departamenti isə azərbaycanlı diplomatın arvadının saxlanılması faktını şərh etməyib.
KİV-də yayılan xəbərə münasibət bildirən XİN-nin mətbuat xidmətinin rəhbəri Hikmət Hacıyevin sözlərinə görə, hazırda bu məsələ araşdırılır:
“Burada qaranlıq və anlaşılmazlıq doğuran məqamlar var. Təxribat, şər və böhtan elementlərinin olması istisna deyil. İddia olunan hadisənin araşdırılması əvəzinə dərhal bu barədə KİV-ə məlumat ötürülməsi ciddi sual doğurur və bizə müəmmalı görünür. Hər bir halda məsələ araşdırılacaq”- deyə, XİN rəsmisi qeyd edib.
Babək Cahandarov
