Masallıda evdən yaşlı qadın meyiti tapılıb
Masallı rayonunda evlərdən birində yaşlı qadın meyiti tapılıb.
1news.az-ın APA-ya istinadən verdiyi xəbərə görə, rayonun Ərkivan qəsəbəsində 72 yaşlı Gülgəz İsmayılovanın üzərində zorakılıq əlamətləri olan cəsədi evində aşkarlanıb.
Məlumata görə, G.İsrafilova Ərkivan qəsəbəsinin Abaslı məhəlləsindəki evində yaşayıb. Səhər saatlarında evə gələn oğlu Mübariz İsrafilov qapının bağlı olduğunu görərək, pəncərədən içəri keçib. Anası yerdə uzanmış vəziyyətdə olub. Yaxınlaşdıqda onun öldüyünü görüb.
Uzun müddətdir şəkərli diabet xəstəliyindən əziyyət çəkdiyi bildirilən qadının yıxılaraq öldüyü güman edilir. Onun baş nahiyəsində xəsarət aşkarlanıb. Ehtimal olunur ki, yaşlı qadın yıxılarkən başından xəsarət alıb.
Hadisə barədə hüquq-mühafizə orqanlarına məlumat verilib. İlkin araşdırma zamanı evə basqın olmadığı, heç bir qiymətli əşyaya toxunulmadığı müəyyənləşib. Meyit müayinə olunmaq üçün morqa aparılıb.
Faktla bağlı araşdırma aparılır.
Babək Cahandarov
