Xızı və Altıağacın içməli su və kanalizasiya sistemləri yenidən qurulur – FOTO

“Azərsu” Açıq Səhmdar Cəmiyyəti regionların sosial-iqtisadi inkişafı Dövlət Proqramına uyğun olaraq bölgələrdə əhalinin içməli su təchizatının yaxşılaşdırılması istiqamətində layihələrin icrasını davam etdirir. 

ASC-nin ictimaiyyətlə əlaqələr şöbəsindən 1news.az-a verilən məlumata görə, geniş turizm potensialına malik Xızı  şəhərində və Altıağac qəsəbəsində içməli su və kanalizasiya sistemlərinin yenidən qurulması layihəsi üzrə işlər intensiv qaydada həyata keçirilir.

Xızı şəhəri və Altıağac qəsəbəsinin su təchizatı və kanalizasiya sistemlərinin yenidən qurulması Azərbaycan hökuməti və Yaponiya Beynəlxalq Əməkdaşlıq Agentliyi tərəfindən birgə maliyyələşdirilən “Kiçik şəhərlərdə Su Təchizatı və Kanalizasiya Layihəsi” çərçivəsində həyata keçirilir. Layihə 2030-cu ilə qədər perspektiv inkişaf nəzərə alınmaqla Xızı şəhərində  3294, Altıağac qəsəbəsində 1423 nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb.  Layihə çərçivəsində rayonun 1562 nəfər əhalisi olan  Baxışlı, Tıxlı, Xələc kəndlərinə də içməli su veriləcəkdir. Ümumilikdə layihədən 6279 nəfər faydalanacaq.

Layihənin birinci mərhələsində Qars su mənbəyində məhsuldarlığı 430 kubmetr/sutka, Yeddibulaq su mənbəyində məhsuldarlığı 40 kubmetr/sutka olan sugötürücü qurğu tikilib, 8,4 km magistral su xətti çəkilib.

Xızı şəhəri və Altıağac qəsəbəsinin içməli suya olan tələbatının tam ödənilməsi və kanalizasiya sistemlərinin yenidən qurulması layihənin növbəti mərhələsində həyata keçirilir. Bu mərhələ çərçivəsində Dahardibi  su mənbəyində məhsuldarlığı 864 kubmetr/sutka, Şəfa su mənbəyində isə 240 kubmetr/sutka olan sugötürücü qurğular, həmçinin ümumi uzunluğu 9,6 km olan magistral su kəmərləri inşa olunur.

Eyni zamanda Xızı şəhərində hər birinin tutumu  1000 kubmetr olan 2 ədəd, Altıağac qəsəbəsində isə hər birinin tutumu  400 kubmetr olan 2 ədəd su anbarının inşası davam etdirilir. Hər iki yaşayış məntəqəsində ümumi uzunluğu 52 km olan su şəbəkəsinin 10 km-lik hissəsi tikilib.

İlk dəfə olaraq Xızı şəhəri və Altıağac qəsəbəsində kanalizasiya şəbəkəsi də yaradılır. İndiyədək ümumi uzunluğun 32 km kanalizasiya şəbəkəsinin 17 km-lik hissəsi inşa olunub.

Tullantı sularının təmizlənərək kənarlaşdırılması məqsədilə Xızı şəhərində məhsuldarlığı 1000 kubmetr/sutka, Altıağac qəsəbəsində isə məhsuldarlığı 350 kubmetr/sutka olan çirkab su təmizləyici qurğular tikiləcək.

Layihənin icrasının 2018-ci ildə başa çatdırılması nəzərdə tututlur.

Xızı şəhərinin ilk mərkəzləşdirilmiş içməli su təchizatı sistemləri 1980-ci illərdə yaradılmışdır. Şəhərə içməli su Dahardibi və Qars bulaqlarından sutkada 1-2 saatlıq rejimlə verilir. Altıağac qəsəbəsində mərkəzləşdirilmiş içməli su təchizatı sistemi 1980-ci illərin əvvəllərində yaradılıb. Qəsəbəyə içməli su Yeddibulaq su mənbəyindən sutkada  2-3 saatlıq rejimlə verilir. Xızı şəhəri və Altıağac qəsəbələrində kanalizasiya sistemləri mövcud  deyil.

Qeyd edək ki, “Kiçik şəhərlərdə Su Təchizatı və Kanalizasiya Layihəsi”  çərçivəsində Xızı şəhəri ilə yanaşı, Qusar, Xaçmaz, Naftalan və  Qobustan şəhərlərinin su təchizatı və kanalizasiya sistemlərinin yenidən qurulması nəzərdə tutulur.  Artıq Qusar və Naftalan şəhərlərində su və kanalizasiya layihələrinin icrası  başa çatıb, digər rayonlarda isə işlər  davam etdirilir.

Babək Cahandarov